AKADEMİK ZƏRİFƏ ƏLİYEVANIN ABİDƏSİNİN AÇILIŞ MƏRASİMİ
Dövlətimizin başçısı həmin küçədə yerləşən və xalqımızın görkəmli övladının adı verilmiş mərkəzi parkda Zərifə Əliyevanın abidəsinin açılış mərasimində iştirak etdi.
Mərasimi Kiyev vilayəti dövlət administrasiyasının sədri Anatoli Zasuxa açdı.
KİYEV VİLAYƏTİ DÖVLƏT ADMİNİSTRASİYASININ SƏDRİ
ANATOLİ ZASUXANIN ÇIXIŞI
- Çox hörmətli İlham Heydəroviç!
Çox hörmətli xanım Əliyeva!
Hörmətli azərbaycanlı dostlar!
Əziz həmyerlilər!
İrpen şəhərinin həyatında bugünkü hadisə unudulmazdır. Bu, xarici dövlətin prezidentinin şəhərinizə ilk səfəridir. Bu, müasir Ukraynanın tarixində yeni səhifədir, Azərbaycan-Ukrayna münasibətlərinin yeni tarixində səhifədir.
Azərbaycanda 29 min ukraynalı, Ukrayna torpağında 400 mindən çox azərbaycanlı yaşayır. Bu gün biz Taras Qriqoryeviç Şevçenkonun abidəsini ziyarət etdik. Azərbaycan Prezidenti abidənin önünə gül-çiçək qoydu. Azərbaycan diasporunun və İrpen şəhəri sakinlərinin dostluğu bu abidədən başlanmışdır. Kiyev vilayəti nümayəndə heyətinin ötən ilin iyununda Bakıya səfəri bu dostluğun davamı oldu. Azərbaycan Prezidenti, əfsanəvi insan Heydər Əliyeviç Əliyev ilə görüşlərdən alınan təəssürat unudulmayacaqdır. Biz Bakı şəhərinin Qaradağ rayonunda Lesya Ukrainka adına park açdıq. Bu il orada şairimizin büstü qoyulacaqdır.
Hörmətli cənab Prezident, biz Sizin səfərinizə çoxdan hazırlaşırdıq. Sizin səfərinizin intizarı çox həyəcanlandırıcı oldu. Budur, indi Siz bizim torpağımızdasınız. Bu gün Siz öz ananızın – görkəmli alim, akademik Zərifə Əliyevanın abidəsini aça bilərsiniz.
Hörmətli cənab Prezident, sözü Sizə verirəm.
AZƏRBAYCAN PREZİDENTİ İLHAM ƏLİYEVİN
NİTQİ
- Əziz dostlar!
İcazə verin, ilk növbədə, dostluğa görə, Azərbaycana, ölkəmizin nümayəndəsinə - bu gün abidəsini birlikdə açdığımız görkəmli alim Zərifə Əliyevaya münasibətə görə sizə öz ehtiramımı və minnətdarlığımı bildirim.
Zərifə Əliyeva heyrətamiz insan idi. O, bütün həyatını elmə, təbabətə həsr etmişdi, çox məşhur oftalmoloq-praktik, habelə böyük alim idi. O, insanlara görmə qabiliyyətini qaytarırdı. Onun fəaliyyəti və elmi əsərləri sayəsində müasir oftalmologiya çox böyük uğurlara nail olmuşdur. Eyni zamanda, o, çox xeyirxah, həssas insan, son dərəcə qayğıkeş ana və atam üçün sadiq dost, yaxşı məsləkdaş idi. Əlbəttə, onun həyatdan getməsi təkcə ailəmizin üzvləri üçün deyil, həm də onu tanıyanların və onunla ünsiyyətdə olanların hamısı üçün çox böyük itki idi. Aradan artıq neçə illər keçmişdir, lakin bu itkinin ağrısı çox kəskin duyulur.
Bu gün qardaş Ukrayna torpağında, İrpen şəhərində Zərifə Əliyevanın abidəsinin açılışında iştirak etmək mənim üçün ikiqat xoşdur.
Mən dünəndən Ukraynadayam, dövlət səfərini həyata keçirirəm və özümü dostlarımın arasında hiss edirəm. Böyük qayğı və diqqətlə əhatə olunmuşam, mənə çox böyük qonaqpərvərlik göstərilir. Fürsətdən istifadə edərək, dəvətə və səmimi münasibətə görə, ilk növbədə, Ukrayna Prezidenti Leonid Daniloviç Kuçmaya təşəkkürümü bildirmək istəyirəm.
Dünən Ukrayna ilə Azərbaycan arasında 9 dövlətlərarası saziş imzalandı. Bu sənədlər ölkələrimizi və xalqlarımızı daha da yaxınlaşdıracaq, ikitərəfli münasibətlərdə, regional və beynəlxalq miqyaslı münasibətlərdə daha fəal iştirak etməyə imkan verəcəkdir. Ölkələrimiz arasında tarixən dostluq və qardaşlıq münasibətləri olmuşdur və mövcuddur. Müstəqillik əldə edildikdən sonra Ukraynanın və Azərbaycanın əsl tərəfdaşlar, strateji tərəfdaşlar olması faktı, ilk növbədə onu göstərir ki, ötən illərdə ölkələrimizdə həyata keçirilən siyasət səmərəli və düzgün olmuşdur. Mən münasibətlərimizin daha da möhkəmlənməsi üçün bu siyasəti Azərbaycanda davam etdirəcəyəm, ölkələrimiz, xalqlarımız arasında daha sıx əlaqələr olmasına çalışacağam.
Azərbaycanda Ukraynanı və ukraynalıları çox sevirlər, Ukrayna dilinə, mədəniyyətinə böyük səmimiyyətlə yanaşır, Azərbaycanın ali məktəblərində Ukrayna dilini öyrənirlər. Bütün bunlar da dövlətlərimiz arasında münasibətlərin daha da inkişaf etdirilməsi üçün çox yaxşı bazadır.
Dediyim kimi, biz yaxın ölkələrik, strateji tərəfdaşlarıq, bütün dünyada baş verən proseslərdə vahid mövqedən fəal iştirak edirik. Bizi, eyni zamanda, səmimi insani münasibətlər – dostluq, qarşılıqlı rəğbət, qarşılıqlı hörmət telləri bağlayır. Bax, elə bugünkü gün, Azərbaycanın görkəmli nümayəndəsi Zərifə Əliyevaya Ukraynada abidə açılması dostluq münasibətlərimizin, xalqlarımızın bir-birinə dərin məhəbbət və hörmət hisslərinin ifadəsidir. Fürsətdən istifadə edərək, abidənin qoyulmasında, bu gözəl parkın, habelə indən belə Zərifə Əliyevanın adını daşıyacaq küçənin abadlaşdırılmasında fəal iştiraka görə Kiyev vilayəti hökumətinin başçısı cənab Zasuxaya və İrpen Şəhər Şurasının başçısı cənab Skarçinskiyə şəxsən təşəkkür etmək istəyirəm.
Mən həm Ukraynaya dost dövlətin – Azərbaycan dövlətinin Prezidenti kimi, həm də Zərifə Əliyevanın oğlu kimi minnətdaram. Əminəm ki, bütün dövrlərdə - Sovet İttifaqında yaşadığımız dövrdə də, ən başlıcası isə, ölkələrimiz müstəqilliyə qovuşduqdan sonra da mövcud olmuş dostluq, qarşılıqlı yardım, qarşılıqlı dəstək münasibətləri davam etdiriləcək, ölkələrimizə və xalqlarımıza daha böyük fayda gətirəcəkdir.
Bir daha Ukraynaya, Ukrayna xalqına, gözəl İrpen şəhərinin sakinlərinə ən dərin hörmət hisslərimi və Azərbaycana, Zərifə Əliyevanın xatirəsinə belə münasibətə görə təşəkkürümü qəbul edin.
Sağ olun!
X X X
Sonra Prezident İlham Əliyev mərasimə toplaşanların alqış sədaları altında abidənin üzərindən ağ örtüyü götürdü.
Abidənin önünə Azərbaycan Prezidentinin adından əklil qoyuldu. Mərasim iştirakçıları abidənin qarşısına gül-çiçək düzdülər.
Respublikamızın rəhbəri abidənin müəllifi, Xarkov şəhərində yaşayan həmyerlimiz, Ukraynanın xalq rəssamı, heykəltəraş Seyfəddin Qurbanov ilə görüşdü, Zərifə xanım Əliyevanın adını daşıyan parkda xatirə ağacı əkdi.
Bölmənin digər xəbərləri
