ALİ BAŞ KOMANDAN CƏBHƏ XƏTTİNDƏ OLMUŞ, HƏRBÇİLƏRİ MÜKAFATLANDIRMIŞDIR
 |
 |
 |
 |
 |
Azərbaycan Prezidenti, Silahlı Qüvvələrin Ali baş komandanı İlham Əliyev yanvarın 17-də Ağdam rayonuna səfəri zamanı cəbhə xəttində də olmuşdur.
Hərbçilər Ali baş komandana raport verdilər.
Dövlətimizin başçısı səngərdə qurulmuş məntəqədən işğal altında olan əraziləri müşahidə etdi, əsgərlərin ixtiyarındakı hərbi ləvazimatla tanış oldu.
Azərbaycan Prezidenti, Silahlı Qüvvələrin Ali baş komandanı İlham Əliyev döyüş bölgəsindəki xidmətdə fərqlənən hərbçiləri - baş leytenant Pərviz Ələkbərovu, kiçik çavuş Cavid Muradovu, əsgər Əzizxan Vəliyevi medallarla təltif etdi.
Çay süfrəsi arxasında əsgərlərlə söhbət edən Prezident İlham Əliyev dedi:
-Ordumuza xidmət etmək çox şərəfli işdir. Amma ön mövqedə dayanmaq, əlbəttə, böyük məsuliyyətdir. Bizdə atəşkəs rejimi var, amma sülh sazişi yoxdur. Özü də bu atəşkəs rejimi tez-tez pozulur. Ona görə siz bütün hadisələrə hər an hazır olmalısınız. İndi geyimlə, yeməklə bağlı vəziyyət yaxşıdır.
SƏFƏR ƏBİYEV (müdafiə naziri): Cənab Prezident, heç bir problem yoxdur.
İLHAM ƏLİYEV: Yaxşı yemək olmalıdır, xüsusilə bu hava şəraitində, isti paltar olmalıdır.
SƏFƏR ƏBİYEV: Sizə minnətdarlığımızı bildirmək istəyirik. Çox gərgin iş qrafikinizə baxmayaraq, vaxt ayırıb buraya gəldiniz. Çox sağ olun. Bir neçə rayonda hərbçilər üçün evlər tikilir. Hesab edirik ki, bu ilin axırına kimi onları Sizin göstərişinizlə təhvil verəcəyik.
İLHAM ƏLİYEV: Orduya diqqət həmişə yüksək səviyyədə olmalıdır. İndi Azərbaycanın dövlət xərclərinin ən böyük hissəsi orduya yönəldilir. Bu il büdcədə ən böyük xərclər ordu quruculuğunadır, yəni 1 milyard 200 milyon dollar xərclənəcəkdir. Əlbəttə ki, buraya silahların alınması, zabitlərin sosial məsələlərinin həlli də daxildir. Nazir dedi, evlər tikilir, maaş artırılıbdır. Gələcəkdə yenə də artıracağıq. Bizim əsgərlərimiz, zabitlərimiz, gizirlərimiz sosial baxımdan müdafiə olunmalıdırlar. İndi bizim iqtisadi imkanımız da artır, yeni binalar tikiləcəkdir. Hərbi hissələr tikilir və tikilməlidir, maaş da artırılacaqdır. O tərəfdə, bizim torpaqlarımızı işğal edən işğalçı qüvvələr bunu bilirlər. Bilirlər ki, vaxt gələcək və onlar buradan çıxmalı olacaqlar. Onlar üçün yaxşı olar ki, öz xoşları ilə, müharibəsiz getsinlər. Yox, getməsələr, onda öz torpaqlarımızı geri qaytarmağa bizim tam haqqımız var. Haqqımız var, indi imkanımız da var, silahımız da var, əsgərlərimiz də var. Ona görə peşəkarlıq artırılmalıdır və xüsusilə belə çətin şəraitdə xidmət edənlər üçün yaxşı şərait yaradılmalıdır.
Yenə də deyirəm, ordunun hər bir hissəsində xidmət etmək böyük şərəfdir. Ancaq düşmənlə ön mövqedə üzbəüz olmaq sizin üçün çox böyük bir vəzifədir. Siz hamınız gəncsiniz.
Neçə yaşınız var?
ƏSGƏRLƏR: 19-20 yaşımız var.
İLHAM ƏLİYEV: Gəncsiniz, amma siz Azərbaycanın müdafiəsində, keşiyində dayanmısınız. Azərbaycanın güclü, vətənpərvər gənc nəsli yetişir.
Bu gün Ağdamda yeni gözəl Olimpiya İdman Kompleksi istifadəyə verilmişdir ki, gənclər orada idmanla məşğul olsunlar. Bizim işimiz haqq işidir. Biz başqasının torpağını zəbt etməmişik. Ona görə bütün cəhətlərdən, o cümlədən həm mənəvi cəhətdən, həm tarix baxımından, həm də hüquqi baxımdan tam haqlıyıq ki, düşməni buradan vurub çıxaraq. Elə də olacaqdır.
X X X
Ali baş komandan İlham Əliyev daha sonra artilleriya bölüyündə oldu, burada xidmətdə fərqlənənlərə medallar təqdim etdi.
Bölmənin digər xəbərləri
