Almaniya Kansleri Ukraynanın Aİ-də “assosiativ üzv” statusu almasını təklif edib
Bakı, 21 may, AZƏRTAC
Almaniya Kansleri Fridrix Merts Kiyevin Aİ-yə sürətli üzvlük çağırışına cavab olaraq Ukraynanın Avropa İttifaqının “assosiativ üzvü” kimi yeni xüsusi status almasını təklif edib.
AZƏRTAC alman mediasına istinadla xəbər verir ki, Kansler Aİ liderlərinə göndərdiyi məktubda Rusiyanın qonşusu olan Ukraynanın Aİ qurumlarına daha sıx inteqrasiyasını təklif edib. Lakin təklif olunan statusda Kiyevə tam üzvlük və ya səsvermə hüququ verilməyəcək.
Merts bu təşəbbüsü Ukraynanın müharibə vəziyyətində olan bir ölkə kimi unikal vəziyyətini və üzvlük danışıqlarında əldə edilən əhəmiyyətli irəliləyişi qeyd etməklə əsaslandırıb. Onun sözlərinə görə, təklif ABŞ Prezidenti Donald Trampın başlatdığı sülh danışıqlarını asanlaşdırmaq üçün nəzərdə tutulub. Digər məsələlərlə yanaşı, üzv dövlətlərin Aİ-nin qarşılıqlı yardım bəndini Ukraynaya da tətbiq etmək üçün siyasi öhdəliyi də nəzərə alınacaq.
Brüsseldəki Alman Mətbuat Agentliyinə (dpa) təqdim edilən məktuba görə, xüsusi status Ukrayna və onun vətəndaşlarına Rusiyanın təcavüzünə qarşı davam edən mübarizələrində təcili ehtiyac duyduqları güclü siyasi siqnal göndərəcək.
Bu arada, Merts Ukraynanın Aİ-yə vaxtında tam üzvlüyünün qeyri-real qaldığına inanırdı. Kansler buna səbəb kimi “saysız-hesabsız maneələri” və bir neçə üzv dövlətdə siyasi cəhətdən çətin ratifikasiya proseslərini göstərir. O, Aİ Şurasının rəhbəri Antonio Koştaya, Aİ Komissiyanın Prezidenti Ursula Fon der Lyayenə və Aİ Şurasının sədrliyini təmsil edən yunan Kipri administrasiyasının Prezidenti Nikos Xristodulidesə yazdığı məktubda bildirib: “Qoşulma prosesini qısa müddətdə başa çatdıra bilməyəcəyimiz göz qabağındadır”.
Bölmənin digər xəbərləri
