Almaniyada Çinə casusluq etməkdə şübhəli bilinən iki nəfər saxlanılıb
Berlin, 20 may, AZƏRTAC
Almaniyanın Federal Baş Prokurorluğu Çin kəşfiyyat xidməti üçün casusluq fəaliyyəti göstərməkdə şübhəli bilinən iki nəfərin Münxendə saxlanıldığını açıqlayıb.
AZƏRTAC xəbər verir ki, prokurorluğun məlumatında Almaniya vətəndaşı olan ər-arvadın müxtəlif universitet və elmi-tədqiqat müəssisələrində çalışan alimlərlə əlaqələr quraraq hərbi məqsədlərlə istifadə oluna biləcək yüksək texnologiyalar sahəsində məlumat toplamağa çalışdıqları bildirilib.
Məlumata əsasən, saxlanılan şəxslər aerokosmik mühəndislik, informatika və süni intellekt sahələrində fəaliyyət göstərən alimlərlə təmasda olublar. Onların özlərini bəzən tərcüməçi, bəzən isə avtomobil sənayesi nümayəndəsi kimi təqdim etdikləri qeyd edilir. Hətta bəzi alimlərin mülki auditoriya qarşısında ödənişli əsaslarla çıxış etmək bəhanəsi ilə Çinə dəvət olunduqları, lakin mühazirələrin əslində dövlətə məxsus müdafiə sənayesi şirkətlərinin nümayəndələri üçün təşkil edildiyi vurğulanıb.
Çinli ər-arvadın saxlanılması ilə eyni vaxtda Baden-Vürtemberq, Bavariya, Berlin, Brandenburq, Aşağı Saksoniya və Şimali Reyn-Vestfaliya əyalətlərində də əməliyyat tədbirləri keçirilib. Bu tədbirlərin şahid qismində dindirilən şəxslərlə bağlı olduğu, onların cinayətdə şübhəli hesab edilmədikləri bildirilib.
Elvin Mövsüm
Bölmənin digər xəbərləri
