Almaniyada tanınmış animasiya filmləri rejissoru Məsud Pənahi mükafatlandırılıb
Bakı, 22 dekabr, AZƏRTAC
Azərbaycanın Almaniyadakı səfirliyi tanınmış rejissor, rəssam, animator, ssenarist və yazıçı Məsud Pənahini “Xüsusi tanınma və minnətdarlıq işarəsi” diplomu ilə təltif edib.
AZƏRTAC xəbər verir ki, rejissorun 80 illik yubileyi və Almaniyadakı azərbaycanlı icmasına göstərdiyi davamlı səylərə görə verilən mükafat səfir Nəsimi Ağayev tərəfindən təqdim olunub.
Məsud Pənahi animasiya sənətinə əhəmiyyətli töhfələr verib. O, 60-dan çox animasiya filminin müəllifidir. “Azərbaycanfilm” studiyasında işləyərkən, “Pıspısa xanım və Siçan bəy” (“Tıq-Tıq xanım”) məşhur filmini çəkib.
Hazırda Məsud Pənahi “Narqız” adlı yeni animasiya filmi üzərində çalışır. “Narqız” filminin əsas maarifləndirici məqsədi işğaldan azad olunmuş ərazilərdə düşmənin basdırdığı mina sahələrinə diqqəti yönəltmək, minaların necə təhlükəli olduğunu uşaqların diqqətinə çatdırmaqdır. Film Azərbaycan Respublikası Kino Agentliyinin dəstəyi ilə çəkiləcək.
Pənahi, həmçinin mədəni və ictimai həyatda fəal iştirak edir, 2022-ci ildən Azərbaycan Animasiya Assosiasiyasının üzvüdür.
Bölmənin digər xəbərləri
