Almaniyalı qonaqlar ARDNŞ-in Ekologiya Parkında olmuşlar
Bakı, 22 fevral (AZƏRTAC). Almaniyanın Ətraf Mühit, Təbiətin Mühafizəsi və Nüvə Təhlükəsizliyi üzrə Federal Nazirliyinin nümayəndələri Azərbaycan Respublikası Dövlət Neft Şirkətinin (ARDNŞ) Ekologiya Parkında olmuşlar.
AZƏRTAC xəbər verir ki, qonaqlara ARDNŞ-də həyata keçirilən ekoloji layihələr, neftlə çirklənmiş torpaqların təmizlənməsi, Ekoparkın yaradılmasının qısa tarixçəsi, məqsədi, parkda görülən işlər və gələcək planlar, Ekomərkəz, həmçinin parkın alternativ enerji vasitələri haqqında ətraflı məlumat verilmişdir. Qonaqlar parkda fəaliyyət göstərən qapalı şitilxananın toxum, böyütmə, oranjereya şöbələrində aparılan işlər, becərilən və yerli şəraitə uyğunlaşdırılmış ağac-kol növləri göstərilmişdir. Parkda qorunaraq çoxaldılan nadir və nəsli kəsilmək təhlükəsi olan bəzi bitki növlərinin çoxaldılma üsulları ilə tanış olmuşlar. Ekoparkda görülən işlər qonaqların marağına səbəb olmuş və gələcəkdə hər iki tərəf ekoloji layihələrin həyata keçirilməsi sahəsində əməkdaşlıq etmək arzusunda olduqlarını bildirmişlər.
Sonda qonaqlar xatirə kitabına öz ürək sözlərini yazmışlar.
Bölmənin digər xəbərləri
