AMAF PREZİDENTİ MOSKVADA RUSİYALI HƏMKARI İLƏ GÖRÜŞMÜŞDÜR
Bakı, 7 iyun (AZƏRTAC). Azərbaycan Milli Avarçəkmə Federasiyasının (AMAF) mətbuat xidmətindən bildirmişlər ki,
federasiyanın prezidenti Elçin Zeynalov iyunun 6-da Moskvada Rusiya Avarçəkmə İdmanı Federasiyasının (FQSR) prezidenti Leonid Draçevski ilə görüşmüşdür.
Rusiya paytaxtında keçirilən akademik avarçəkmə üzrə sayca 48-ci “Böyük Moskva reqatası” çərçivəsində baş tutan görüşdə L.Draçevski Azərbaycanda avarçəkmə növlərinin sürətli inkişafından və ölkəmizdə təcrübəli mütəxəssislərin çalışmasından xəbərdar olduğunu diqqətə çatdırmışdır. Azərbaycanın avarçəkmə növlərində uzunmüddətli inkişaf proqramı ilə maraqlanan L.Draçevski ölkəmizin bu sahədəki təcrübəsindən yararlanmalarının mümkünlüyünü qeyd etmişdir.
Görüşdə E.Zeynalov ölkəmizdə avarçəkmə növlərinin vəziyyəti və irəliləyişlər haqda məlumat vermişdir. Hazırda Mingəçevir şəhərində inşa olunan “Kür” Olimpiya İdman Mərkəzinin bu ilin sonlarında istifadəyə verilməsindən sonra bu sahənin inkişafı üçün daha geniş imkanların yaranacağı vurğulanmışdır.
L.Draçevski 2008-ci ilin əvvəllərində Rusiyanın gənclərdən ibarət yığma komandasının Mingəçevirdə təlim-məşq toplantısında və beynəlxalq “Prezident Kuboku reqatası”nda iştirakını xatırlatmış, gələn il də ənənəvi turnirə qatılacaqlarını bildirmişdir.
Bölmənin digər xəbərləri
