ANKARADA XOCALI SOYQIRIMININ 17-Cİ İLDÖNÜMÜ İLƏ BAĞLI TƏDBİRLƏR KEÇİRİLMİŞDİR
Ankara, 26 fevral (AZƏRTAC). Azərbaycanın Türkiyədəki səfirliyi Heydər Əliyev Fonudunun təşəbbüsü ilə Xocalı soyqırımının 17-ci ildönümü ilə əlaqədar bir sıra tədbirlər keçirmişdir.
Fevralın 26-da Ankaranın Keçiörən rayonundakı Esterqon qalasında soyqırımı qurbanlarının xatirəsinə ucaldılmış abidənin önünə əklil qoyulmuşdur. Səfir Zakir Həşimov və Keçiörən bələdiyyəsinin sədri Turqut Altınok buradakı əbədi məşəli alovlandırmışlar.
Azərbaycan xalqının ümummilli lideri Heydər Əliyevin, Türkiyə
Cümhuriyyətinin banisi Mustafa Kamal Atatürkün və şəhidlərimizin xatirəsi bir dəqiqəlik sükutla yad edilmiş, onların ruhuna dualar oxunmuşdur.
Keçiörən bələdiyyəsi işçilərinin, siyasətçilərin, ictimaiyyətin nümayəndələrinin, Türkiyədə təhsil alan müdavim və tələbələrimizin, səfirliyin əməkdaşlarının, jurnalistlərin iştirak etdikləri mərasimdə çıxış edən səfir Zakir Həşimov, Milli Məclisin deputatı Qənirə Paşayeva, Keçiörən bələdiyyəsinin sədri Turqut Altınok ermənilərin Türkiyə və Azərbaycan xalqlarına qarşı törətdikləri qətliamlardan, Xocalıda günahsız insanların vəhşicəsinə qətlə yetirilməsindən bəhs etmiş, qardaş xalqlarımızın məkrli düşmənə qarşı mübarizəsinin getdikcə gücləndiyini vurğulamışlar.
Səfir Zakir Həşimov 2005-ci ildə Xocalı qətliamını soyqırımı kimi tanıyan qərar qəbul edən və Xocalı qurbanlarının xatirəsinə abidə ucaldan Ankaranın Keçiörən bələdiyyəsinə və onun sədri Turqut Altınoka təşəkkür etdi. Ümidvar olduğunu bildirdi ki, digər şəhərlər də bu cür qərarlar qəbul edəcəklər.
Həmin gün Ankaradakı Qazi Universiteti ilə birlikdə “Sözün bitdiyi yer” adlı böyük bir anma tədbiri keçirilmişdir. Tədbirdə Azərbaycandan dəvət olunan qonaqlarla birlikdə universitetin müəllim və tələbə heyəti, soydaşlarımız, Türkiyənin yüksək səlahiyyətli nümayəndələri iştirak etmişlər.
Anma tədbirində çıxış edən Qazi Universitetinin rektoru, professor Rıza Ayhan demişdir ki, qardaş Türkiyə və Azərbaycan güclü dövlət olmaq istəyirlərsə, düşmənlərin məkrlərinə qarşı sayıq və tədbirli olmalıdırlar. Güclü dövlətlərin əlində alət olan erməni diasporuna qarşı birgə təbliğatla mübarizə aparmaq bu baxımdan olduqca zəruridir. Bu məsələdə ali təhsil ocaqlarının üzərinə də böyük vəzifələr düşür.
Qazi Universitetinin professoru Yusuf Halacoğlu əsrlər boyu ermənilərin Şərqi Anadoluda və Azərbaycanda törətdikləri qətliamları konkret faktlarla diqqətə çatdırmışdır. Bildirmişdir ki, ötən il Axtamar adasında erməni kilsəsini bərpa edən hökumət bir tarixi faktı da nəzərə almalı idi. I Dünya müharibəsi illərində erməni quldurları kəndlərdən əsir aldıqları türk qadınlarını Van gölü ilə bu kilsəyə aparmaq istəmişlər. Qansız erməni vəhşilərinin niyyətini anlayan və aqibətlərini bilən qeyrətli xanımlar özlərini suya ataraq boğulmuşlar. Yaxşı olardı ki, Axtamar adasında bu qadınlara da bir abidə ucaldılaydı. Erməni quldurları təkcə İğdırda 21 kəndi yer üzündən silmiş, Qars, Van, Bitlisdə ağır qətliamlar törətmişlər. İndi, “üzr istəmə” kampaniyasının üzvləri desinlər: kim kimdən üzr istəməlidir?
BMT-nin Qaçqınlar üzrə Ali Komissarlığının Türkiyə nümayəndəliyinin təmsilçisi Mətin Çorabatır erməni işğalı nəticəsində 1 milyondan çox azərbaycanlının başına gətirilən müsibətlərdən ətraflı bəhs etmişdir. Bildirmişdir ki, Ermənistan BMT Təhlükəsizlik Şurasının qətnamələrinə əməl etməli, işğal altında saxladıqları Azərbaycan torpaqlarını tezliklə azad etməli və qaçqın və köçkünlər doğma yurd-yuvalarına qayıtmalıdırlar.
Azərbaycan Milli Məclisinin deputatı Qənirə Paşayeva çıxışında Xocalı soyqırımı, Dağlıq Qarabağın işğalı, ermənilərin məkrli siyasətindən bəhs etmiş, vurğulamışdır ki, bu gün vahid düşmənə qarşı mübarizədə türk dünyasının dahi şəxsiyyəti Heydər Əliyevin bizə miras qoyduğu “bir millət, iki dövlət” kəlamına uyğun olaraq Türkiyə və Azərbaycan daha monolit bir güc kimi çıxış etməlidirlər. Ermənilərdən “üzr istəmə” kampaniyasına qoşulanlar tarixin dərslərini yaxşı öyrənməli və nəticə çıxarmalıdırlar. Türkiyə mətbuatı da Azərbaycanın dərdlərinə daha həssas yanaşmalıdır.
Ölkəmizin Türkiyədəki səfiri Zakir Həşimov isə Türkiyə ilə Azərbaycanın həmrəyliyinin önəmli olduğuna diqqətə çatdırmışdır.
Tədbirin sonunda Heydər Əliyev Fondunun hazırladığı, Xocalı soyqırımını əks etdirən film nümayiş etdirildi. Burada İslam Konfransı Gənclər Forumunun mədəniyyətlərarası dialoq üzrə baş əlaqələndiricisi Leyla Əliyevanın irəli sürdüyü “Xocalıya ədalət” beynəlxalq kampaniyası üçün açılan www.justiceforkhojaly.org saytının da təqdimat mərasimi oldu.
Tədbirdən sonra Xocalı soyqırımını əks etdirən sərgidə Heydər Əliyev Fondunun təqdim etdiyi fotolar, kitablar, broşürlər iştirakçılara paylandı. Həmçinin Heydər Əliyev Fondunun və səfirliyin birgə hazırladığı “Xocalı və onun dəhşətləri” bukletləri də iştirakçılara təqdim olundu.
Oqtay Bayramov
AZƏRTAC-ın xüsusi müxbiri
Ankara
######
Bölmənin digər xəbərləri
