Anqolanın OPEC-i tərk etməsi neftin qiymətlərinə təsir etməyib
Bakı, 22 dekabr, AZƏRTAC
Anqolanın 16 il üzvü olduğu Neft İxrac Edən Ölkələr Təşkilatını (OPEC) tərk etməsi dünya bazarlarında xam neftin qiymətlərinə təsir etməyib. AZƏRTAC “Bloomberg” agentliyinə istinadla xəbər verir ki, Afrikanın neft hasilatçısı ölkəsinin xam neft hasilatı kvotası məsələsində anlaşılmazlıq səbəbindən atdığı bu addımdan sonra “Brent” markalı neftin qiymətlərində cüzi bahalaşma da qeydə alınıb.
Anqola daha əvvəl OPEC liderlərinin hasilatın azaldılması təklifini rədd etmişdi. Bu ölkənin hökuməti bəyan edib ki, qəbul etdiyi qərar kartelin qlobal neft bazarında sabitlik üzrə fəaliyyətinə təsir etməyəcək.
Anqolanın OPEC- tərk etməsi ilə təşkilatın üzvlərinin sayı 12-yə düşüb. Ekspertlər hesab edirlər ki, bu, xam neftin qiymətlərinin 20 faiz ucuzlaşdığı son 3 ay ərzində yaxşı xəbər deyil. Belə ki, Səudiyyə Ərəbistanının liderlik etdiyi OPEC və qeyri-üzv hasilatçı ölkələr ABŞ-ın hasilatı artırması fonunda qlobal bazarlarda sabitliyi təmin etməyə çalışır.
Bölmənin digər xəbərləri
