RƏSMİ XRONİKA
ANS ŞİRKƏTLƏR QRUPUNUN PREZİDENTİ VAHİD MUSTAFAYEVİN ÇIXIŞI
-Möhtərəm cənab Prezident!
Hörmətli xanımlar və cənablar!
ANS Şirkətlər Qrupu və Milli Qəhrəman Çingiz Mustafayev adına Fond “2007-ci ilin adamı” mükafatı və diplomunun təqdim olunması mərasimində sizi ürəkdən salamlayır.
Müstəqil Azərbaycan dövləti onun hər bir vətəndaşının toxunulmaz sərvətidir. Yerləşdiyimiz mürəkkəb geosiyasi məkan, Azərbaycanın qarşısına qoyduğu ali məqsədlər bu gün ölkəmizi bütün dünyanın diqqət mərkəzinə çıxarıbdır.
Azərbaycanın əldə etdiyi nəticələr onu artıq Cənubi Qafqazın aparıcı dövlətinə çeviribdir. Elə buradaca qeyd edim ki, bu uğurların mühüm bir hissəsi Heydər Əliyev xəttini bacarıqla davam etdirən və onu müasir dövrün hər an dəyişən tələblərinə özünəməxsus şəkildə uyğunlaşdıran Prezident İlham Əliyevlə bağlıdır.
“Mən hər bir azərbaycanlının Prezidentiyəm” deyə dövləti idarə etməyə başlayan İlham Əliyevdən ötrü 2007-ci il bu sözləri əməldə sübut etmək üçün növbəti fürsət oldu. Dövlət başçısı istər daxili, istər xarici siyasəti ilə nümayiş etdirdi ki, onun rəhbərliyi altında görülən işlər heç də konyunkturaya hesablanmış taktiki gedişlər deyil, daha çox uzaqmənzilli xarakter daşıyır.
2007-ci ildə Azərbaycan Prezidenti İlham Əliyev region üçün xüsusi əhəmiyyətə malik Bakı-Tbilisi-Qars dəmir yolu xəttinin təməlinin qoyulmasına nail oldu. Layihə həm də ona görə xüsusi qiymətə layiqdir ki, Azərbaycan bu işə heç bir iri dövlətin açıq maddi və siyasi dəstəyi olmadan özü imza atdı. Bu isə asan məsələ deyildi.
Layihənin üzləşdiyi çətinlikləri Bakı-Tbilisi-Ceyhan kəmərinin işə düşməsi ərəfəsində ölkəmizin üzləşdiyi təzyiqlərlə müqayisə etmək olar. Uzağa getməyək, Azərbaycanın layihədəki müttəfiqlərindən biri olan Gürcüstanda inqilabi proseslər məhz təməlqoyma ərəfəsinə təsadüf etdi.
ANS şirkətlər qrupu və Çingiz Mustafayev adına Fond bu çox mühüm regional layihəni birmənalı müsbət addım kimi Azərbaycan Prezidentinin aktivinə yazıbdır.
Bu gün beynəlxalq enerji təhlükəsizliyi dünyanın prioritetinə, Azərbaycan bu təhlükəsizlik sisteminin fəal tərkib hissəsinə çevrilibdır. 2007-ci il bu baxımdan çox faydalı oldu. Azərbaycan qazı Avropaya məhz ötən il çıxdı və bununla da İlham Əliyev Azərbaycanın beynəlxalq enerji təhlükəsizliyi sistemindəki rolunu maksimum artırdı.
Çingiz Mustafayev adına Fond və ANS Şirkətlər Qrupu Azərbaycan qazının Avropaya çıxmasını Prezidentin 2007-ci ildə davam etdirdiyi enerji siyasətinin beynəlxalq etirafı kimi dəyərləndiribdir.
Qeyd etmək lazımdır ki, bütün bu nailiyyətlər dünyada gedən dramatik proseslər fonunda baş veribdir. Amerika Birləşmiş Ştatları və İran İslam Respublikası arasında yaşanan gərginlik 2007-ci ildə özünün, az qala, zirvə saatına çatdı.
İlham Əliyev isə xüsusilə gərginləşmiş bu münasibətlər fonunda yürütdüyü tarazlaşdırılmış siyasət nəticəsində Azərbaycanı mümkün təhlükələrdən etibarlı surətdə qorudu.
Biz burada iki faktı xüsusilə qeyd etməliyik. Əvvəla, Azərbaycan antiterror koalisiyasında Birləşmiş Ştatların əsas müttəfiqi və strateji tərəfdaşlarından biridir. Digəri isə, 20 milyondan artıq azərbaycanlının yaşadığı İran İslam Respublikası ilə ölkəmizin tarixi qonşuluq və qardaşlıq ənənəsinin bundan sonra da qorunması məsələsi idi.
Çingiz Mustafayev adına Fond və ANS Şirkətlər Qrupu Prezidentin bu son dərəcə mürəkkəb vəziyyətdən çıxmaq bacarığını da qiymətləndirdi.
2007-ci ildə dövlət başçısının daxili siyasi xətti öz geniş miqyası və rəngarəngliyi ilə diqqəti cəlb edir. Biz Prezidenti hər yerdə görürdük. Bir il ərzində Bakıda neçə-neçə körpü, yolötürücüləri, yeraltı keçidlər tikildi.
Paytaxtda və bölgələrdə yeni iş yerlərinin açılması, ən ucqar rayonlara belə qaz xətlərinin çəkilməsi İlham Əliyevin Prezident kimi içdiyi anda qoyduğu hörmətin təsdiqi oldu.
Azərbaycanda yoxsulluq həddində yaşayanların səviyyəsinin 16 faizə enməsi barədə rəsmi məlumat da dövlət başçısının ilin adamı elan olunması ərəfəsinə təsadüf etdi.
Bu il Azərbaycanda son çadır şəhərciyi ləğv olundu. Məcburi köçkünlərin güzəranı xeyli yaxşılaşdı. İlham Əliyevi ilin adamı elan edərkən bütün bunlar da nəzərə alınıbdır.
Azərbaycan varlandıqca, dövlətləndikcə onun ordusu da qüdrətlənir. Ordunun saxlanmasına ayrılan vəsait ötən il bölgədə rekord həddə çatdı: 812 milyon manat.
Prezidentliyin keçən ili Azərbaycanda artıq ilk hərbi məhsulların istehsal edilməsi, milli silahlı qüvvələrin NATO standartlarına bütünlüklə keçməsi ilə əlamətdar oldu. Müharibə vəziyyətində olan bir ölkənin bu istiqamətdə qazandığı hər bir uğur Azərbaycanın ərazi bütövlüyünün tez bir zamanda bərpa ediləcəyinə olan inamı artırır.
Dövlət başçısı bu yaxınlarda ön xətdəki əsgərlərin yanında da oldu. Bu sadə bir həqiqət idi ki, Ali baş komandan öz hərəkəti ilə deyirdi: “Əsgər, mən sənin yanındayam!”
Nəhayət, Çingiz Mustafayev adına Fond və ANS Şirkətlər Qrupu Azərbaycanın ilk müstəqil teleradio şirkətinin ətrafında 2006-cı ilin sonu-2007-ci ilin əvvəlində yaşanan böhranın və gərginliyin aradan qaldırılmasında, daha doğrusu, ANS-in fəaliyyətinin bərpası və lisenziya müddətinin uzadılmasında Prezident İlham Əliyevin həlledici rolunu, habelə bir qrup jurnalisti həbsdən azad etməsini qiymətləndirməyə bilməzdi. Prezident bu addımı ilə bir daha sübut etdi ki, demokratiya və söz azadlığının yanındadır.
Möhtərəm Prezident!
Xanımlar və cənablar!
İndi isə Sizi, 2007-ci ilin adamının nailiyyətlərini əks etdirən videoçarxa baxmağa dəvət edirəm.
Videoçarxın nümayişindən sonra Vahid Mustafayev elan etdi ki, Prezident İlham Əliyev bu mükafata bir sıra aparıcı dövlətlərin müqavimət və təzyiqlərinə baxmayaraq, Bakı-Tbilisi-Qars dəmir yolu xəttinin təməlinin qoyulmasında, Azərbaycanın beynəlxalq enerji təhlükəsizliyi sistemində yerinin möhkəmlənməsinin tərkib hissəsi olaraq ölkə qazının Avropa bazarına çıxmasında, Amerika Birləşmiş Ştatları və İran İslam Respublikası arasında xüsusilə gərginləşmiş münasibətlər fonunda yürütdüyü tarazlaşdırılmış siyasət nəticəsində Azərbaycanın mümkün təhlükələrdən qorunmasında, ölkədə və paytaxtda infrastruktur layihələrinin uğurla həyata keçirilməsində və yeni iş yerlərinin açılmasında, habelə Azərbaycan ərazisindəki son çadır düşərgəsinin ləğv olunması - vətəndaşların həyat səviyyəsinin yaxşılaşdırılmasında, ordu quruculuğunun uğurla davam etdirilməsində, hərbi sənaye kompleksinin işə düşməsi və ilk hərbi məhsulların əldə edilməsində, Azərbaycan silahlı qüvvələrinin ən müasir standartlara cavab verməsi məqsədi ilə orduya ayrılan vəsaitin kəskin şəkildə artırılmasında, Azərbaycanın ilk müstəqil teleradio şirkəti olan ANS-in fəaliyyətinin bərpası və lisenziyasının uzadılmasında oynadığı müstəsna rola, habelə həbsdə olan jurnalistlərin azadlığa buraxılmasına görə layiq görülmüşdür.
X X X
Ənənəyə uyğun olaraq, Prezident İlham Əliyevə xüsusi diplom, Çingiz Mustafayev Fondu adından 5000 manat məbləğində pul mükafatı, ANS Şirkətlər Qrupu adından isə məxsusi hazırlanmış, tam əl işi olan GLASHÜTTÜ qol saatı təqdim edildi.
Dövlətimizin başçısına diplomu Milli Qəhrəman, telejurnalist Çingiz Mustafayevin oğlu Fuad Mustafayev təqdim etdi.
Prezident İlham Əliyev mərasimdə geniş nitq söylədi.
X X X
Azərbaycan Prezidenti İlham Əliyev mərasim başa çatandan sonra ANS Şirkətlər Qrupunun və Çingiz Mustafayev adına Fondun əməkdaşları, Milli Qəhrəmanın ailə üzvləri ilə xatirə şəkli çəkdirdi.