Aprel döyüşləri Ermənistanda dərin hərbi və siyasi böhrana gətirib çıxardı
Bakı, 30 mart, AZƏRTAC
Azərbaycan Ordusunun 2016-cı il aprelin 2-dən 5-dək davam edən uğurlu əks-hücum əməliyyatları ölkəmizə hərbi-strateji nöqteyi-nəzərdən çox böyük üstünlüklər verdi. İlk növbədə Azərbaycan çox mühüm psixoloji qələbə qazandı. Ordumuz düşmənə sarsıdıcı zərbələr endirdi, Qarabağın şimal və cənub hissələrində çox böyük strateji əhəmiyyətə malik yüksəklikləri azad etdi. Bununla da Azərbaycan öz torpaqlarını azad etmək bacarığını, potensialını, döyüş əzmini nümayiş etdirdi. Nəticədə 4 günlük döyüşlərin beynəlxalq əks-sədası da dərhal eşidildi.
Bu fikirləri AZƏRTAC-a açıqlamasında “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin Əlaqələndirmə Şurasının sədri, Qarabağ Araşdırmalar Mərkəzinin rəhbəri, siyasi elmlər doktoru Elçin Əhmədov deyib.
Elçin Əhmədov bildirib ki, Azərbaycan Prezidenti İlham Əliyev Lələtəpə əməliyyatını bizim şanlı tariximiz adlandıraraq aprel döyüşlərinin Azərbaycan dövlətinin, Azərbaycan Ordusunun gücünü göstərdiyini qeyd edib. Döyüş meydanında düşmənə sübut etdik ki, biz güclüyük. Biz ermənilərin uzun illər ərzində yaratdıqları mifi, yalanı dağıtdıq ki, guya onların belə güclü ordusu var. Sübut etdik ki, kimin ordusu güclüdür, kimin ordusu nəyə qadirdir. Biz həm Füzuli və Cəbrayıl rayonlarında, eyni zamanda, Ağdərə rayonunda bir çox strateji yerləri işğalçılardan azad etdik. Biz keçmiş Dağlıq Qarabağ muxtar vilayətinin ərazisi olan yerləri də qaytardıq.
Aprel döyüşləri zamanı Azərbaycan Ordusunun uğurlu əməliyyatı nəticəsində Cəbrayıl rayonunun erməni işğalından azad edilmiş Cocuq Mərcanlı kəndində insanların təhlükəsiz yaşaması mümkün oldu. Bununla da tarixən burada yaşamış dinc əhalinin öz doğma yurdlarına qayıtması üçün Azərbaycan Silahlı Qüvvələrinin tam nəzarətinə keçmiş həmin ərazilərdə əsaslı yenidənqurma işlərinin başlanmasına şərait yarandı. Bütün bunlar onu göstərir ki, aprel döyüşləri ilə mühüm hərbi qələbənin, Cocuq Mərcanlı kəndinin bərpası ilə böyük qayıdışın başlanğıcı qoyuldu.
Dövlətimizin başçısının qeyd etdiyi kimi, aprel döyüşləri tariximizin şanlı səhifəsidir. Çox qürurverici haldır ki, hazırda Füzuli, Cəbrayıl, Ağdərə rayonlarının işğaldan azad edilmiş hissəsində Azərbaycan bayrağı dalğalanır. Minlərlə hektar torpaq işğaldan azad edilib. On minlərlə hektar torpağa bu gün Azərbaycan Ordusu nəzarət edir. O torpaqlarda təmizlik işləri aparılır və yaxın gələcəkdə məcburi köçkünlər həmin ərazilərə qayıdacaqlar. Prezidentin düşünülmüş siyasəti və prinsipial mövqeyi onu göstərir ki, biz nəinki Cocuq Mərcanlıya, eləcə də Dağlıq Qarabağa, Xankəndiyə, Xocalıya, Şuşaya qayıdacağıq.
Əgər aprel döyüşlərinə qədər ermənilər öz mifoloji fəaliyyətlərində müəyyən dərəcədə uğurlar qazana bilmişdilərsə, aprel döyüşləri onların təbliğatına ciddi zərbə vurdu, erməni cəmiyyətini sarsıtdı. O sarsıntının fəsadları bu günə qədər Ermənistanda hiss olunur. Aprel hadisələri Ermənistanda dərin hərbi və siyasi böhrana gətirib çıxardı.
Elçin Əhmədov qeyd edib ki, Azərbaycan Prezidenti İlham Əliyevin dəfələrlə və birmənalı olaraq “Azərbaycanın ərazi bütövlüyü danışıqlar mövzusu ola bilməz” fikrini irəli sürməsi ölkəmizin ərazi bütövlüyü təmin olunmaqla münaqişənin ədalətli şəkildə həlli ilə bağlı ümidləri daha da artırıb. Dövlətimizin başçısı torpaqlarımızı azad etmək üçün əsasımızın olduğunu və bunun beynəlxalq hüquq normaları ilə təsdiq edildiyini vurğulayaraq deyib: “Azərbaycanın ərazi bütövlüyü bərpa edilməlidir. Biz heç vaxt Azərbaycan ərazisində ikinci qondarma erməni dövlətinin yaranmasına icazə verməyəcəyik. Heç vaxt Dağlıq Qarabağa müstəqillik verilməyəcək. Əgər kimsə bunu gözləyirsə, qoy, əbəs yerə gözləməsin. Bu, olmayacaq!”
Bölmənin digər xəbərləri
