CƏMİYYƏT
Aprelin 7-də Bərdədə sosial sahə üzrə rəqəmsal savadlılıq təlimi keçiriləcək
Bakı, 6 aprel, AZƏRTAC
Əmək və Əhalinin Sosial Müdafiəsi Nazirliyinin tabeliyindəki DOST Rəqəmsal İnnovasiyalar Mərkəzi bölgələrdə əhalinin sosial sahə üzrə elektron xidmətlərə dair savadlılığının artırılması üçün təlimlərə Bərdə rayonunda başlayacaq.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, aprelin 7-də saat 11:00-da nazirliyin tabeliyindəki Dövlət Sosial Müdafiə Fondunun Bərdə rayonundakı Qarabağ regional filialında keçiriləcək təlimdə yerli sakinlərə sosial sahə üzrə e-xidmətlər və onlardan istifadəyə dair praktik məlumatlar veriləcək, sualları cavablandırılacaq.
Bu tədbirlər Prezident İlham Əliyevin Sərəncamı ilə təsdiq edilmiş “Korrupsiyaya qarşı mübarizənin gücləndirilməsinə dair 2022─2026-cı illər üçün Milli Fəaliyyət Planı” üzrə Tədbirlər Planının müvafiq bəndinə əsasən təşkil olunur. Məqsəd regionlarda əhalinin rəqəmsallaşma istiqamətində bilik və bacarıqlarının artırılmasıdır.
Təlimlərin ölkəmizin digər bölgələrində də təşkili nəzərdə tutulub.