“Aqroparkların inkişafında yeni mərhələ” mövzusunda tədbir keçirilib
Bakı, 28 avqust, AZƏRTAC
Kənd Təsərrüfatı Nazirliyində “Aqroparkların inkişafında yeni mərhələ” mövzusunda tədbir keçirilib.
Nazirlikdən AZƏRTAC-a bildirilib ki, keçirilən tədbirdə əsas məqsəd aqroparkların fəaliyyətinin daha da təkmilləşdirilməsində qarşıya çıxan çətinlikləri müzakirə etmək və onların həlli yollarını araşdırmaq, hədəflər və innovativ inkişaf istiqamətləri barədə fikir mübadiləsi aparmaq olub.
Tədbiri giriş sözü ilə açan kənd təsərrüfatı nazirinin müavini İlhamə Qədimova bildirib ki, Prezident İlham Əliyevin imzaladığı 2025-ci il 14 aprel tarixli 363 saylı Fərmana əsasən, dövlət tərəfindən aqroparkların yaradılması və aqroparkların fəaliyyətinin tənzimlənməsi ilə bağlı tədbirləri həyata keçirmək səlahiyyəti Kənd Təsərrüfatı Nazirliyinə verilib. Bu istiqamətdə qarşıda duran əsas vəzifələrdən birinin ərzaq təhlükəsizliyi və kənd təsərrüfatının müasirləşdirilməsi məqsədlərinə uyğun olaraq aqroparkların yaradılması və istehsalın doğru istiqamətdə təşviqi olduğunu deyən nazir müavini kənd təsərrüfatı istehsalının dayanıqlı inkişafının, resurslardan səmərəli istifadənin dövlət dəstəyində də əsas prioritet təşkil edəcəyini qeyd edib. Aqroparkların fəaliyyətinin daha da yaxşı təşkilinin ölkəmizdə aqrar sahənin dayanıqlı inkişafını dəstəkləyəcək amillərdən biri olduğunu vurğulayan İlhamə Qədimova vurğulayıb ki, keçirilən müzakirələr aqroparkların fəaliyyətini səmərəli qaydada qurmağa, məhsul istehsalını artırmağa, aqrar emal sənayesini genişləndirməyə dair təkliflər formalaşdırmağa imkan verəcək.
Nazirliyin Azad olunmuş ərazilərlə və aqroparklarla iş şöbəsinin müdiri İlqar Məhərrəmov “Aqroparklarla bağlı dövlət siyasətinin əsas istiqamətləri, gələcəyə baxış” mövzusunda təqdimatla çıxış edib.
Aqroparkların fəaliyyətinin hüquqi bazası və inkişaf perspektivləri barədə iştirakçıları məlumatlandıran İ.Məhərrəmov bildirib ki, aqrar sahədə iri istehsal və emal subyektlərinin yaradılmasında əsas məqsəd innovativ texnologiya və üsullar əsasında rəqabətyönümlü kənd təsərrüfatı məhsullarının istehsalını artırmaq, qeyri-neft sektorunun davamlı inkişafının təmin etmək, aqrar sənaye istehsalı sahəsində məşğulluq səviyyəsini yüksəltməkdir. Ölkəmizdə aqroparkların fəaliyyətinin əsas prioritet istiqamətlərinin birillik əkinlər, tərəvəzçilik, toxumçuluq və tingçilik, örtülü sahələrdə innovativ üsullarla bitkiçilik, heyvandarlıq, quşçuluq və balıqyetişdirmə, kənd təsərrüfatı məhsullarının emalı, çeşidlənməsi və qablaşdırılması olduğunu deyən şöbə müdiri bu fəaliyyətlərin genişləndirilməsi üçün görülən stimullaşdırıcı tədbirlər barədə iştirakçıları məlumatlandırıb.
Daha sonra Kənd Təsərrüfatı Nazirliyinin tabeliyində Aqrar Tədqiqatlar Mərkəzi Publik Hüquqi Şəxsin direktoru Rəşad Hüseynov “Aqroparklarla işin təşkili sahəsində yanaşmalar” mövzusunda təqdimat edib. İmzalanan müvafiq Fərmana əsasən, Aqrar Tədqiqatlar Mərkəzinin aqroparkların fəaliyyətinin təşkilində idarəedici orqan kimi müəyyən olunduğunu xatırladan ATM direktoru qarşıya qoyulan vəzifələr, tapşırıqların icrası, qanunvericilik bazasının təkmilləşdirilməsi, aqroparkın fəaliyyətinin təşkili, idarə olunması və inkişafı ilə bağlı tədbirlərin hazırlanaraq həyata keçirilməsi, rezidentlərin qeydiyyata alınması və onlara müvafiq şəhadətnamələrin verilməsi qaydaları barədə iştirakçıları məlumatlandırıb. Mərkəz tərəfindən aqroparkların fəaliyyətinə dair yeni inkişaf konsepsiyasının hazırlanacağını deyən R.Hüseynov bununla bağlı ATM və aqroparklar arasında sıx əməkdaşlığın qurulacağına əminliyini ifadə edib.
Tədbirdə “Aqrar sahədə süni intellektin tətbiqi imkanları” mövzusunda təqdimat edən Aqrar sahədə süni intellekt layihəsinin rəhbəri Surxay Novruzov son illər bütün dünyada olduğu kimi, Azərbaycanda da aqrar sahədə süni intellektin tətbiqinin genişləndiyini diqqətə çatdırıb. Hazırda nazirlik tərəfindən bu istiqamətdə həyata keçirilməkdə olan layihələr barədə iştirakçıları məlumatlandıran S.Novruzov qeyd edib ki, üzərində iş gedən layihələr- əkinçilik, bağçılıq, toxumçuluq üzrə ixtisaslaşmış fermerlərə bölgələr üzrə torpağa uyğun düzgün bitki seçimi aparmağa, regionlar üzrə bitki xəstəlikləri üzrə risk səviyyələrini müəyyənləşdirməyə və bitki sağlamlığına düzgün nəzarət etməyə və bütün bunlara uyğun olaraq əkinləri planlaşdırmağa imkan verəcək.
Təqdimatlardan sonra aqroparkların fəaliyyətində meydana çıxan çətinliklər və onların həlli yolları, iri istehsal müəssisələrinin fəaliyyətinin stimullaşdırılması və digər mövzularla bağlı müzakirələr aparılıb. Müzakirələrdə çıxış edən aqroparkların təmsilçiləri rəqabətədavamlı kənd təsərrüfatı məhsullarının istehsalı, emalı, qablaşdırılması və ixracı ilə bağlı vəziyyət barədə geniş məlumat verib, mövcud potensialın daha səmərəli dəyərləndirilməsi ilə bağlı təkliflər səsləndiriblər. Aqropark nümayəndələri, həmçinin suvarma suyu təminatı, meliorativ tədbirlər, enerji təminatı və ekoloji məsələlərlə bağlı çətinliklərinin olduğunu və problemlərin həlli istiqamətdə dövlət dəstəyinə ehtiyac olduğunu söyləyiblər.
Sonda tədbir iştirakçılarının sualları cavablandırılıb, səsləndirilən təkliflər qeydə alınıb, təklif və müraciətlərin araşdırılması ilə bağlı müvafiq qurumlarla görüşlər planlaşdırılıb. Həmçinin Kənd Təsərrüfatı Nazirliyi ilə aqroparklar arasında səmərəli əməkdaşlığın davam etdirilməsi üçün bu cür müzakirələrin mühüm əhəmiyyət kəsb etdiyi vurğulanıb.
Bölmənin digər xəbərləri
