ARAL DƏNİZİNİN SAHİLLƏRİNDƏ İKİ QƏDİM ŞƏHƏRİN QALIQLARI AŞKAR OLUNMUŞDUR

04.07.2004 [04:10]
Çap et
A⁺ A^-

AZƏRTAC-ın xüsusi müxbiri xəbər verir ki, arxeoloqlar Aral dənizinin səhraya çevrilmiş ərazisində iki qədim oğuz şəhərinin qalıqlarını aşkar etmişlər. Şəhərləri bir-birindən 20 kilometrlik məsafə ayırır. Arxeoloqların qənaətinə görə, XIV əsrdə dəniz qalxmağa başlamış, bu iki şəhər suyun altında qalmış və əhali xilas ola bilməmişdir.

Alimlər qeyd etmişlər ki, tanınmış Azərbaycan şərqşünası Ziya Bünyadovun “Xarəzmşahlar dövləti” kitabında Aral dənizinin sahillərində XII əsrə aid olan Rabat-Taqan, Jenit, Jankent şəhərləri haqqında söhbət açılır. Qalıqları tapılan bu şəhərlər məhz kitabda adı çəkilən üç şəhərdən ikisidir.

Arxeoloqlar bu ərazidə XI-XIV əsrə aid edilən qədim oğuz məbədinin qalıqlarını da tapmışlar. Məbəd Türküstan şəhərindəki Xoca Əhməd Yasəvinin mavzoleyi ilə eynidir.

Hazırda Qazaxıstan arxeoloqları bu şəhərləri tədqiq etmək üçün xüsusi ekspedisiya hazırlayırlar.