ARAZ ÇAYININ YENİ QOLUNDA MÜVAFİQ İŞLƏR GÖRÜLÜR
İmişli, 1 iyun (AZƏRTAC). Kür çayının daşması nəticəsində daşqından əziyyət çəkən rayonlarda Prezident İlham Əliyevin göstərişlərinə uyğun olaraq kompleks işlər davam etdirilir.
Araz çayının yeni qolunda da müvafiq tədbirlər görülür. Yeni qolda suyun axma sürəti saniyədə 250 kubmetrdir.
Mayın 31-də Xudafərin su anbarına suyun yığılması ilə bağlı İranla razılaşmanın müddəti bitdiyinə görə, su yenidən Araz çayına buraxılmışdır.
“Meliorasiya və Su Təsərrüfatı” Açıq Səhimdar Cəmiyyətinin sədri Əhməd Əhmədzadə bildirmişdir ki, bununla da Araz çayında suyun axma sürəti artmışdır. Artıq Xudafərin su anbarından buraxılan su Arazın yeni qolu ilə ötürülür. Hazırda Araz çayından Kürə saniyədə 465- 480 kubmetr su axır. Arazın yeni qolu ilə saniyədə 240-250 kubmetr su ötürülür.
Sel və daşqınlar nəticəsində avtomobil və dəmir yollarında yaranan problemlərin aradan qaldırılması istiqamətində də lazımi tədbirlər görülür. Nəqliyyat Nazirliyindən verilən məlumata görə, Biləsuvar istiqamətində Araz çayı üzərindən 82 metr uzunluğunda körpünün inşası davam etdirilir. 10 aşırımdan ibarət olacaq körpünün inşası 10 gün ərzində başa çatacaqdır.
Təbii fəlakət bölgəsində sanitar-epidemioloji vəziyyət də nəzarət altındadır.
Səhiyyə Nazirliyinin məlumatına görə, bölgədə hər hansı xəstəlik qeydə alınmamışdır. Əhaliyə yüksək səviyyəli tibbi xidmətlər göstərilir.
Əhalinin içməli su ilə təmin edilməsində problemlər aradan qaldırılmışdır.
Bölmənin digər xəbərləri
