Araz Əlizadə: Türk Dövlətləri Təşkilatının parlaq gələcəyi üçün bütün imkanlar var
Bakı, 15 noyabr, AZƏRTAC
Türk Şurasının yaradılması prosesi 1992-ci ildə türk dilində danışan ölkələrin görüşləri ilə başlayaraq 2009-cu ildə Naxçıvan sazişinin imzalanması ilə yekunlaşıb. Yarandığı gündən inkişaf edən həmin qurumun üzvləri arasında qarşılıqlı əməkdaşlıq gündən-günə artmaqdadır. Dünyanın aparıcı qüvvəsi olan dövlətlərin beynəlxalq aləmdə hökm sürən qeyri-stabilliyə, ədalətsizliyə adekvat cavab verməmələri və yalnız öz şəxsi maraqları naminə hərəkət etmələri son illərdə yeni geosiyasi reallığın yaranmasına zəmin yaradıb. Ortaq kökü, dili, dini və məqsədləri olan dövlətlərin bir-biri ilə daha sıx əməkdaşlıq etməsi Türkdilli Dövlətlərin Əməkdaşlıq Şurasının nüfuzunu daimi olaraq artırırdı. 2019-cu ildə Bakıda keçirilən Zirvə toplantısında Şuraya sədrlik ölkəmizə keçdi. Ölkəmizin sədrliyi dünyada COVID-19 pandemiyasının hökm sürdüyü dövrə düşsə də, qurumun inkişafı və qarşılıqlı əlaqələrin gücləndirilməsi üçün çox işlər görüldü. Pandemiya dövründə üzv ölkələrin bir-birilərinə, həmçinin digər ölkələrə kömək etmələrini, Bakı Zirvə Görüşündə Özbəkistanın Şuraya qəbul edilməsini və Türk Şurasının İstanbulda keçirilən VIII Zirvə toplantısında Türkmənistanın təşkilata müşahidəçi qismində qoşulmasını vurğulamaq olar.
Bunu AZƏRTAC-a açıqlamasında Azərbaycan Sosial Demokrat Partiyasının sədri Araz Əlizadə deyib.
O qeyd edib ki, Türk Şurasının Türk Dövlətləri Təşkilatına çevrilməsi qurumun daimi inkişafının və nüfuzunun artmasının bariz nümunəsidir. Prezident İlham Əliyevin İstanbulda keçirilən VIII Zirvə toplantısındakı çıxışında qeyd etdiyi kimi: “Bugünkü Zirvə Görüşünün çox böyük tarixi əhəmiyyəti var. İlk növbədə, ona görə ki, biz Şuramızı təşkilata çeviririk və bu təşkilatın çox gözəl gələcəyi var. Çünki bu təşkilatın təməlində təbii müttəfiqlər yerləşir və həm tarix, həm mədəniyyət, həm bizim ənənələrimiz, bizim adət-ənənələrimiz, bax, bu, birliyi diktə edir. Eyni zamanda, indiki dünyada təhlükələr hər ay, hər il yaranır və əfsuslar olsun ki, dünyanın aparıcı ölkələri bu təhlükələrə qarşı düzgün addımlar ata bilmirlər və əminəm ki, Türk Dövlətləri Təşkilatının təkcə ölkələrimiz, xalqlarımız üçün deyil, dünya üçün önəmi bundan sonra da artacaq. Çünki bizim işbirliyimiz səmimidir, biz hamımız qardaşıq, bir-birimizə qardaş deyirik, biz hamımız ənənəvi dəyərlər üzərində ölkələrimizi inkişaf etdiririk. Bizim xalqlarımız arasındakı birlik, qardaşlıq gündən-günə möhkəmlənir və biz bu gün böyük coğrafiyanı əhatə edirik, böyük iqtisadi, siyasi, hərbi gücü bu coğrafiyada ehtiva edirik. Bizim ölkələrimizdə zəngin təbii qaynaqlar var, müasir infrastruktur var, nəqliyyat yolları var. Türkiyə hərbi, iqtisadi və sənaye gücə malik olan ölkədir. Təkcə onu demək kifayətdir ki, Türkiyə NATO-nun ikinci ən güclü ölkəsidir və bunu öz maraqlarını və dünyada sülhü təmin etməklə dəfələrlə göstərmişdir. Ona görə mən çox ümidliyəm ki, bizim təşkilatımız qarşıda duran bütün vəzifələri icra edəcəkdir”.
Partiya sədri bildirib ki, İstanbulda keçirilən Zirvə Görüşündə Türkiyə Prezidenti Rəcəb Tayyib Ərdoğan ölkəmizin işğaldan azad edilmiş Zəngilan rayonunda həyata keçirdiyi “Ağıllı şəhər” layihəsindən bəhs edib. O, Zəngilanda “Ağıllı şəhər” sahəsində başladılan təşəbbüsü təqdirəlayiq hesab edib.
Araz Əlizadənin sözlərinə görə, Ali Baş Komandan, Prezident İlham Əliyevin rəhbərliyi ilə Azərbaycan Ordusunun 44 gün davam edən Vətən müharibəsində əldə etdiyi Zəfərlə torpaqlarımızın işğaldan azad edilməsinə, tarixi ədalətin bərpasına və regionda sülhün bərqərar olunmasına nail olunub. Bu isə regionda sabitlik və daha sıx əməkdaşlığa yol açıb. Həmin uğurlu fəaliyyətin nəticəsi olaraq Prezident İlham Əliyev “Türk Dünyasının Ali Ordeni” ilə təltif edilib.
“2009-cu ildə keçirilən Naxçıvan Zirvə Görüşündə Prezident İlham Əliyev 1920-ci ildə sovetlər hakimiyyətinin Zəngəzuru Azərbaycandan qoparıb Ermənistana verməsi nəticəsində türk dünyasının coğrafi bağlantısının kəsildiyini qeyd etmişdi. Bu gün isə əldə edilən tarixi Qələbə nəticəsində açılacaq Zəngəzur dəhlizi türk dövlətlərinin coğrafi bağlantısını bərpa edəcək. Bu isə təkcə türk dövlətləri üçün deyil “Şərq-Qərb”, “Şimal-Cənub” iqtisadi kəmərə daxil olan bütün dövlətlər üçün iqtisadi fayda verəcək. Bu gün türkdilli dövlətlər arasında ticarət dövriyyəsi 21 milyard dollar təşkil edir. Təşkilata üzv dövlətlər ölkəmizin iqtisadiyyatına 12.3 milyard dollar investisiya qoyub. Azərbaycan da həmin dövlətlərin iqtisadiyyatına 15.3 milyard dollar investisiya yatırıb. Yaranmış yeni geosiyasi reallıq daha sıx iqtisadi əməkdaşlıq və bu rəqəmlərin daha da artması üçün zəmin yaradıb.
Bu gün Türk Dövlətləri Təşkilatının parlaq gələcəyi üçün bütün imkanlar var və əminəm ki, üzv ölkələr bu imkanlardan maksimal istifadə edərək təşkilatı daha da gücləndirəcəklər", - deyə A.Əlizadə qeyd edib.
Bölmənin digər xəbərləri
