ARDNŞ-in birinci vitse-prezidenti, Milli Məclisin deputatı İlham Əliyev oktyabrın 23-də Vaşinqtonda Amerika Birləşmiş Ştatlarının energetika naziri Spenser Abraham, maliyyə nazirinin birinci müavini Kennet Dam, Xəzər hövzəsi diplomatiyası üzrə müşavir Stiven Mən, respublikaçı senator Çak Heygl, Amerika yəhudi təşkilatlarının nümayəndələri, Harvard Universitetində Xəzər araşdırmaları proqramının başçıları , ABŞ-Azərbaycan Ticarət Palatasının həmsədri Tim Seyka ilə görüşlər keçirmiş, Ticarət Palatasının adından təşkil olunmuş rəsmi qəbulda iştirak etmişdir.

ABŞ-IN ENERGETİKA NAZİRİ SPENSER ABRAHAMLA GÖRÜŞ

İlham Əliyev Birləşmiş Ştatların energetika naziri Spenser Abrahamla görüşdə Vaşinqtonun yüksək səviyyəli rəsmiləri və xüsusilə də vitse-prezident Riçard Çeyni ilə apardığı müzakirələr haqqında məlumat vermişdir. O, etibarlı tərəfdaşlıq xarakteri daşıyan ABŞ-Azərbaycan əlaqələrinin inkişaf etdirilməsində cənab Çeyninin göstərdiyi səyləri yüksək qiymətləndirmişdir. İham Əliyev bildirmişdir ki, ABŞ hökumətinin dəstəyi olmadan Azərbaycanda həyata keçirilən enerji layihələrinin gerçəkləşməsi çətin olardı.

Görüş iştirakçıları Bakı-Tbilisi-Ceyhan əsas ixrac neft kəmərinin təməlinin qoyulması mərasimində iştirak etmələrini məmnuniyyətlə xatırlamış, 2005-ci ildə bu kəmərlə ilk neftin Ceyhana çatdırılacağına böyük ümid bəslədiklərini bildirmişlər. Tərəflər Bakı-Ərzurum qaz kəməri layihəsi barədə də fikir mübadiləsi etmiş, bu kəmərin Azərbaycan qazının təkcə Türkiyəyə deyil, həm də dünya bazarlarına çatdırılması üçün əhəmiyyətini vurğulamışlar. Cənab Spenser Abraham Amerika tərəfinin digər sahələrdə də Azərbaycanla əməkdaşlığı genişləndirməyə hazır olduğunu bildirmişdir.

ABŞ-IN MALİYYƏ NAZİRİNİN BİRİNCİ MÜAVİNİ KENNET DAM İLƏ GÖRÜŞ

ARDNŞ-in birinci vitse-prezidenti, Milli Məclisin deputatı İlham Əliyev oktyabrın 23-də ABŞ-ın maliyyə nazirinin birinci müavini Kennet Dam ilə görüşmüşdür. Söhbət zamanı Azərbaycanın makroiqtisadi göstəriciləri, enerji layihələrinin gerçəkləşdirilməsi, Neft Fondunun fəaliyyəti, ölkəmizdə kiçik və orta sahibkarlığın inkişafı məsələləri diqqət mərkəzində olmuşdur. İlham Əliyev ölkəmizin iqtisadiyyatındakı vəziyyət haqqında məlumat verərkən xüsusi vurğulamışdır ki, son bir ildə ümumi daxili məhsulun artımı 9,9 faiz olmuşdur, Azərbaycan adambaşına xarici sərmayələrin həcminə görə MDB məkanında birinci yeri tutur.

Bu günədək neft sektoruna sərmayə qoyuluşu 6 milyard dollar təşkil edir. Gələn 2-3 il ərzində daha 10 milyard dollar sərmayə qoyulması gözlənilir.

ARDNŞ-in birinci vitse-prezidenti Azərbaycanda kiçik və orta sahibkarlığın inkişafına xüsusi əhəmiyyət verildiyini bildirərək demişdir ki, bu sahədə beynəlxalq maliyyə qurumları ilə işbirliyi mövcuddur. Ölkəmizdə aparılan özəlləşdirmə ilə yanaşı, bu qurumlarla birgə əhaliyə mikrokreditlərin verilməsi proqramları da həyata keçirilir.

İlham Əliyev Ermənistan-Azərbaycan münaqişəsi nəticəsində doğma yurdlarından didərgin düşmüş insanların vəziyyətindən də danışmışdır. O, təəssüflə vurğulamışdır ki, bu münaqişə həll olunmadığından qaçqın və köçkünlər neçə illərdir ağır şəraitdə, çadırlarda yaşayır və doğma yurd-yuvalarına qayıda bilmirlər. Azərbaycan tərəfi bu məsələnin həllində ABŞ hökumətinin dəstəyinə ümid bəsləyir.

Ətraflı məlumat üçün təşəkkür edən cənab Kennet Dam ABŞ-ın Azərbaycanla iqtisadi əlaqələrin inkişaf etdirilməsində çox maraqlı olduğunu vurğulamışdır.

ABŞ PREZİDENTİNİN XƏZƏR HÖVZƏSİ DİPLOMATİYASI ÜZRƏ MÜŞAVİRİ STİVEN MƏN İLƏ GÖRÜŞ

İlham Əliyevin oktyabrın 23-də ABŞ prezidentinin Xəzər hövzəsi diplomatiyası üzrə müşaviri Stiven Mən ilə görüşündə Xəzərin enerji ehtiyatlarının hasilatı və dünya bazarlarına nəqlinə dair layihələrin həyata keçirilməsinin vəziyyəti və bu sahədə ABŞ-Azərbaycan əməkdaşlığ barədə geniş fikir mübadiləsi aparılmışdır. Tərəflər enerji layihələrinin, xüsusilə də qaz sektoru ilə bağlı layihələrin perspektivlərini nəzərdən keçirmişlər.

RESPUBLİKAÇI SENATOR ÇAK HEYQLLƏ GÖRÜŞ

ARDNŞ-in birinci vitse-prezidenti, Milli Məclisin deputatı İlham Əliyev həmin gün ABŞ konqresində Nebraska ştatının təmsilçisi respublikaçı senator Çak Heyql ilə görüşmüşdür.

Senator Heyql bildirmişdir ki, o, bölgəmizdə baş verən hadisələrlə daim maraqlanır. İlham Əliyev həmsöhbətinə Vaşinqtona səfəri çərçivəsində apardığı danışıqlar haqqında məlumat vermiş, Azərbaycanın son illərdəki qazandığı nailiyyətlərindən söhbət açmışdır. ARDNŞ-in birinci vitse-prezidenti demişdir ki, Azərbaycana xarici sərmayələrin çoxalması iqtisadi islahatların həyata keçirilməsinin sürətlənməsinə səbəb olmuşdur. Ölkəmizin enerji strategiyasından danışan İlham Əliyev ötən ay mühüm əhəmiyyəti olan Bakı-Tbilisi-Ceyhan kəmərinin tikintisinə başlanmasını xüsusi vurğulamış, əvvəldən bu layihənin gerçəkləşməsi üçün göstərdiyi dəstəyə görə senator Çak Heqlə minnətdarlığını bildirmişdir.

Nebraskalı senator bölgədə enerji layihələrinin həyata keçirilməsinin geniş regionda coğrafi-siyasi sabitliyə müsbət təsir göstərdiyini vurğulamış, Ermənistan-Azərbaycan münaqişəsində tezliklə sülh əldə olunacağına ümid bəslədiyini söyləmişdir.

Cənab Heql Azərbaycan Prezidenti Heydər Əliyevə onun salamını yetirməyi xahiş etmiş, gələn ilin əvvəlində regionumuza səfər etmək niyyətində olduğunu bildirmişdir.

ABŞ-IN YƏHUDİ TƏŞKİLATLARININ

NÜMAYƏNDƏLƏRİ İLƏ GÖRÜŞ

İlham Əliyev oktyabrın 23-də ölkəmizin Vaşinqtondakı səfirliyində Amerika yəhudi təşkilatlarının nümayəndələri ilə görüşmüşdür. ARDNŞ-in birinci vitse-prezidenti yəhudi icmasının nümayəndələrinə Vaşinqtonda yüksək səviyyəli rəsmilərlə apardığı müzakirələrdən danışmış, sonra isə ölkəmizin iqtisadiyyatındakı irəliləyişlər, xüsusilə Xəzərin enerji ehtiyatlarının işlənilməsinə dair layihələrin həyata keçirilməsində əldə olunmuş nailiyyətlər barədə məlumat vermişdir. ABŞ-la antiterror mübarizəsi sahəsində əməkdaşlığın, habelə enerji və təhlükəsizlik sahələrində tərəfdaşlığın möhkəmləndiyini söyləyən İlham Əliyev məmnuniyyətlə bildirmişdir ki, Konqres tərəfindən qəbul edilən ədalətsiz 907-ci maddənin qüvvəsi dayandırıldıqdan sonra ölkələrimiz arasında münasibətlər yeni mərhələyə yüksəlmişdir. İlham Əliyev ABŞ-dakı yəhudi təşkilatlarının nümayəndələrini 907-ci maddənin tamamilə aradan qaldırılması məsələsində Azərbaycanı gələcəkdə də dəstəkləməyə çağırmışdır.

XƏZƏR ARAŞDIRMALARI PROQRAMININ BAŞÇILARI İLƏ GÖRÜŞ

ARDNŞ-in birinci vitse-prezidenti, Milli Məclisin deputatı İlham Əliyevin həmin gün Azərbaycanın Vaşinqtondakı səfirliyində Harvard Universitetində Xəzər Araşdırmaları Proqramının başçıları ilə də görüşü olmuşdur. Görüş iştirakçıları qeyd etmişlər ki, üç il bundan əvvəl yaradılan bu proqram Azərbaycan haqqında həqiqətləri ABŞ ictimaiyyətinə və dünyaya çatdırmaq sahəsində mühüm işlər görmüşdür. Elmi mərkəzin əməkdaşları ABŞ-ın kütləvi informasiya vasitələrində mütəmadi olaraq Ermənistan-Azərbaycan münaqişəsi və bunun ölkəmiz üçün ağır nəticələri haqqında yazılarla çıxış edirlər. Xəzər Araşdırmaları Proqramının tədqiqatçı direktoru xanım Brenda Şaffer İlham Əliyevə Harvard Universitetində 9 azərbayranlı tələbənin bu proqram üzrə təhsil alıb, vətənə qayıtması barədə məlumat vermişdir. İlham Əliyev bu proqramın ölkəmiz üçün əhəmiyyətli olduğunu vurğulamış, ona Azərbaycan tərəfindən lazımi dəstək göstəriləcəyinə söz vermişdir.

ABŞ-AZƏRBAYCAN TİCARƏT PALATASININ HƏMSƏDRİ TİM SEYKA İLƏ GÖRÜŞ

Oktyabrın 23-də İlham Əliyev Vaşinqtondakı Azərbaycan Ticarət və Mədəniyyət Mərkəzində ABŞ-Azərbaycan Ticarət Palatasının həmsədri Tim Seyka ilə görüşmüşdür. Cənab Tim Seyka İlham Əliyevə palatanın fəaliyyəti haqqında geniş məlumat vermişdir. Görüş iştirakçıları məmnuniyyətlə vurğulamışlar ki, ABŞ-Azərbaycan Ticarət Palatası ölkələrimiz arasında əlaqələrin möhkəmlənməsində müsbət rol oynayır.

ABŞ-AZƏRBAYCAN TİCARƏT PALATASINDA RƏSMİ QƏBUL

ARDNŞ-in birinci vitse-prezidenti, Milli Məclisin deputatı İlham Əliyevin Vaşinqtona işgüzar səfəri ilə əlaqədar ABŞ-Azərbaycan Ticarət Palatası oktyabrın 23-də “Uiliard İnterkontenental” mehmanxanasında rəsmi qəbul təşkil etmişdir. Qəbulda Vaşinqtonun yüksək səviyyəli bir sıra rəsmiləri, o cümlədən Missuri ştatını təmsil edən konqresmen Karen MakKarti, müdafiə nazirinin Avrasiyada təhlükəsizlik siyasəti üzrə müavini Mira Rikardel, ATƏT-in Minsk qrupunun amerikalı həmsədri səfir Rudolf Perina, habelə Con Hopkins Universitetinin Mərkəzi Asiya və Qafqaz Araşdırmaları İnstitutunun başçısı doktor Fred Star, Eyzenhauer İnstitutunun başçısı Suzan Eyzenhauer, Vaşinqtondakı diplomatik korpusun nümayəndələri, işgüzar dairələrin təmsilçiləri iştirak edirdilər.

Xanım Karen MakKarti İlham Əliyevi salamlayaraq, 11 sentyabr terror hadisəsindən sonra Azərbaycanın ABŞ-a öz köməyini təklif edən ilk dövlətlərdən olduğunu xatırlatmışdır. O, bunun həmkarları, eləcə də təmsil etdiyi seçicilər tərəfindən yüksək dəyərləndirildiyini vurğulamışdır. Konqresmen Azərbaycan ilə ABŞ arasında energetika sahəsində tərəfdaşlığın həm ölkələrimiz, həm də bütün dünya üçün əhəmiyyətli olduğunu söyləmişdir. İlham Əliyevi təkcə Azərbaycranda deşyil, beynəlxalq aləmdə tanınmış siyasətçi adlandıran xanım MakKarti ARDNŞ-in birinci vitse-prezidentini Vaşinqtonda bir daha salamlayaraq, onunla hər zaman əməkdaşlıq etməyə hazır olduğunu bildirmişdir.

İlham Əliyev ziyafətdə çıxış etmişdir.

Şəfəq Akifqızı

AZƏRTAC-ın xüsusi müxbiri

Foto F. Xayrulinindir

Vaşinqton