Arıların gizli dünyasına səyahət - ölkənin ilk Arıçılıq Muzeyindən reportaj VİDEO
Lənkəran, 7 iyul, AZƏRTAC
Azərbaycanda arıçılıq ənənələrinin qorunması, gələcək nəsillərə çatdırılması və bu sahənin təbliği məqsədilə ölkədə ilk dəfə olaraq Lənkəran rayonunda Arıçılıq Muzeyi yaradılıb.
AZƏRTAC-ın bölgə müxbiri xəbər verir ki, muzeydə qədim dövrlərdən bu günədək arıçılıqda istifadə olunan müxtəlif alətlər, pətək nümunələri, balın emalı və saxlanılması üçün işlədilən ləvazimatlar nümayiş etdirilir. Həmçinin nümayiş olunan eksponatlar arasında arıçılığın inkişaf tarixini əks etdirən fotoşəkillər, sənədlər və digər maraqlı materiallar yer alır. Burada ziyarətçilər arı ailəsi, bal istehsalı prosesi, arı məhsullarının insan sağlamlığındakı rolu və müasir arıçılıq üsulları haqqında geniş məlumat əldə edə bilirlər.
Arıçılıq Muzeyinin yaradılması həm milli arıçılıq irsinin qorunmasına, həm də bölgədə aqroturizmin inkişafına mühüm töhfə verəcək. Muzey yerli və xarici turistlər, məktəblilər, tələbələr, eləcə də arıçılıqla maraqlanan hər kəs üçün maarifləndirici mərkəz kimi fəaliyyət göstərəcək.
Muzeyin yaradılmasının təşəbbüskarı, təcrübəli arıçı Səyavuş Yaqubov layihənin əhəmiyyəti barədə danışarkən deyib: "Uzun illərdir arıçılıqla məşğulam. Həmişə arzum olub ki, Azərbaycanda arıçılığın zəngin tarixini, bu peşənin incəliklərini və topladığımız dəyərli eksponatları nümayiş etdirən bir muzey yaradılsın. Sevindirici haldır ki, bu arzumuz Kənd Təsərrüfatı Nazirliyinin tabeliyində fəaliyyət göstərən “Aqrar Tədarük və Təchizat” ASC-nin həyata keçirdiyi “Şəhərdən Kəndə” layihəsi çərçivəsində reallaşdı və Azərbaycanda ilk Arıçılıq Muzeyi fəaliyyətə başladı".
S.Yaqubovun sözlərinə görə, ekspozisiya elə qurulub ki, bura gələn hər bir insan sahə barədə ətraflı məlumat ala bilsin: "Burada ölkəmizdə arıçılığın tarixi, arıların biologiyası, müxtəlif dövrlərdə istifadə olunmuş avadanlıqlar, eləcə də arı məhsullarının hazırlanması və onların insan sağlamlığı üçün faydaları ilə bağlı xüsusi guşələr yaradılıb. Ziyarətçilər, həmçinin apiterapiya — yəni arı məhsulları ilə müalicə üsulları haqqında da məlumat ala bilirlər. Muzeydə xatirə şəkli çəkdirmək üçün xüsusi foto-zona da fəaliyyət göstərir".
Muzeyin gələcək planlarından bəhs edən arıçı innovativ yeniliklərin də tətbiq olunacağını qeyd edib. "İşlərimiz bununla yekunlaşmır. Gələcəkdə canlı arı ailələrinin nümayiş etdiriləcəyi xüsusi bölmə yaratmağı planlaşdırırıq. Eyni zamanda, süni intellekt texnologiyalarının tətbiqi ilə yerli və xarici qonaqlara müxtəlif dillərdə məlumatların təqdim olunması, interaktiv ekskursiyaların təşkili və daha maraqlı informasiya xidmətlərinin istifadəyə verilməsi nəzərdə tutulur", - deyə o əlavə edib.
Yeni yaradılan muzeyin gələcəkdə müxtəlif sərgilərə, seminar və ustad dərslərinə ev sahibliyi etməsi, arıçılığın inkişafı istiqamətində yeni təşəbbüslərin həyata keçirilməsinə dəstək verməsi planlaşdırılır.
Müxbir- İlkin Adıyev
Bölmənin digər xəbərləri
