DÜNYA
ASLAN ABAŞİDZENİN AVTOMOBİLLƏRİ HƏRRACA QOYULACAQDIR
AZƏRTAC-ın xüsusi müxbiri xəbər verir ki, Acarıstan Muxtar Respublikasının sabiq başçısı Aslan Abaşidzeyə məxsus üç ədəd “Hamer” markalı bahalı avtomaşın və cins it təsərrüfatı hərraca qoyulacaqdır. Gürcüstanın baş prokuroru İrakli Okruaşvilinin sözlərinə görə, buradan gələn gəlir müxtəlif sosial proqramların və Acarıstanın yüksək dağlıq rayonlarının sosial problemlərinin maliyyələşdirilməsinə xərclənəcəkdir.
Aslan Abaşidzenin hakimiyyətinin son günlərində Acarıstanı Gürcüstanın digər bölgələri ilə birləşdirən Çoloki körpüsü partladılmışdı. Mayın 10-da həmin körpü bərpa olunmuş, buradan keçən ilk avtomobili Gürcüstan Prezidenti Mixail Saakaşvili idarə etmişdir. Prezident toplaşanlar qarşısında çıxışında Acarıstanda mövcud 18 nazirliyin ixtisara salınıb 4-ə endiriləcəyini, A.Abaşidze rejiminin süqutundan sonra əhalinin dörddə üçünün tərksilah olunduğunu bildirmişdir.