AŞPA-dakı qətnamələrin əksəriyyəti hüquqi əsası və icra mexanizmi olmayan qərarlara çevrilib - RƏY
Bakı, 25 yanvar, AZƏRTAC
Avropa Şurası Parlament Assambleyasının (AŞPA) Azərbaycan-Ermənistan münaqişəsinin davam etdiyi 30 il ərzində, eyni zamanda, 44 günlük Vətən müharibəsi zamanı və müharibədən sonra daim ermənipərəst mövqe ilə çıxış etdiyi hər kəsə məlumdur. Sözsüz ki, uzun illər ölkəmizə qarşı yürüdülən haqsız siyasət qarşısında ötən gün Azərbaycanın AŞPA-dakı nümayəndə heyətinin həmin qurumla əməkdaşlığını və təşkilatdakı iştirakını qeyri-müəyyən müddətə dayandırması verilmiş doğru qərardır. Azərbaycan nümayəndə heyəti fəaliyyətini bərpa etmək üçün müəyyən məsələlərə aydınlıq gətirilməsini gözləyir. Nəzərə almaq lazımdır ki, uzun illər ölkəmizə qarşı həyata keçirilən ikili standartlara və oyunbazlıqlara baxmayaraq, Azərbaycan nümayəndə heyəti baş verənlərə səbirlə yanaşıb, qurumun sessiyalarında iştiraka davam edib. Bu günlərdə keçirilən sonuncu sessiyada isə Azərbaycanın qurumda səsvermə hüququnun məhdudlaşdırılması ilə bağlı revanşist təklif müzakirəyə çıxarıldı. Ancaq Azərbaycan tərəfinin humanist yanaşmasından bu formada sui-istifadə etmək olmaz.
Bu fikirləri AZƏRTAC-a açıqlamasında politoloq Sahil İsgəndərov səsləndirib.
Azərbaycan nümayəndə heyətinin qərarının, həmçinin digər Avropa qurumlarına və təsisatlarına ciddi mesaj olduğunu diqqətə çatdıran siyasi şərhçi deyib: “Nəzərə almaq lazımdır ki, həm Avropa İttifaqının (Aİ) Xarici Əlaqələr və Təhlükəsizlik Siyasəti üzrə ali nümayəndəsi, Aİ Komissiyasının vitse-prezidenti Cozep Borrelin ölkəmizə qarşı səsləndirdiyi əsassız ittihamlar, həm də Fransa Senatının rəsmi Bakı ilə bağlı radikal qərarları mövcuddur. Ona görə digər təşkilatlar da Azərbaycanın bu qərarından nəticə çıxarmalıdır. AŞPA-nın rəhbərliyi konkret olaraq öz səhvini başa düşüb Azərbaycana qarşı mövqeyini dəyişərsə, o halda fəaliyyətimizin bərpası nəzərdən keçirilə bilər”.
Politoloq qeyd edib ki, Cənubi Qafqaz regionunda artıq bir çox reallıqlar dəyişib. Azərbaycan regionun lider dövlətinə çevrilib. Dünyada baş verən mürəkkəb hadisələr fonunda ölkəmizin nüfuzu gündən-günə artmaqdadır. Bütün bu reallıqlara nəzər yetirdikdə, əslində, AŞPA və digər Avropa təsisatları Azərbaycanla əməkdaşlığa daha da can atmalı və yüksək qiymət verməli idilər. Çox təəssüf ki, biz bütün bunların əksini müşahidə edirik. Azərbaycanın nüfuzu artdıqca xüsusilə AŞPA-dakı deputatların və digər təsisatların ölkəmizə qarşı radikal addımları daha da sərtləşir. Onu da nəzərə almaq lazımdır ki, AŞPA-da Azərbaycana qarşı ifrat ermənipərəst mövqedən çıxış edənlərin əksəriyyətinin Cənubi Qafqazla bağlı təsəvvürləri belə yoxdur. Bu proseslərdə xüsusilə Fransanı təmsil edən deputatlar daha çox canfəşanlıq edirlər. Bütün bunlar fransalı deputatların yeni kəndirbazlıq oyunlarının nəticələridir. Onlar bu yolla Azərbaycanı bu və ya digər şəkildə nəyəsə vadar etməyə çalışırlar. Ancaq bilməlidirlər ki, Azərbaycan torpaqlarının 20 faizinin işğal altında olduğu illərdə belə onların mümkün təzyiqlərinə boyun əyməyib”, - deyə o qeyd edib.
S. İsgəndərov bildirib ki, Azərbaycana qarşı qərəzli mövqe tutanların əksəriyyətini, o cümlədən AŞPA-dakı deputatları ölkəmizdə keçiriləcək prezident seçkiləri narahat edir. Buna görə də belə bir önəmli hadisə ərəfəsində ölkəmizə qarşı bu və ya digər şəkildə qarayaxma kampaniyasına start veriblər. Lakin bunların hamısı siyasi oyunbazlıqdan başqa bir şey deyil.
“AŞPA-dakı qətnamələrin əksəriyyətinin hətta 30 nəfərin iştirakı ilə səsverməyə qoyularaq keçdiyinin dəfələrlə şahidi olmuşuq. Bu qətnamələrin əksəriyyəti kağız üzərində hüquqi əsası və icra mexanizmi olmayan qərarlara çevrilib. Hesab edirəm ki, gələcək sessiyada Azərbaycan nümayəndə heyətinin iştirak etməməsi və ölkəmizin əleyhinə hansısa qətnamənin qəbul olunması heç nəyi dəyişməyəcək. Əgər AŞPA bu haqsız qərarından lazımi nəticə çıxarmasa, düşünürəm ki, Azərbaycan, ümumiyyətlə, həmin qurumda iştirakını birdəfəlik də dayandıra bilər. Ancaq əvvəllər də şahidi olduğumuz kimi, düşünürəm ki, AŞPA yenə də geri addım atacaq. Çünki zaman keçdikcə erməni ianələrinin təsiri azalacaq. Məlumdur ki, uzun zamandır artıq Avropa təsisatlarının özlərinin daxilində ciddi qarşıdurmalar, ixtilaflar baş verməkdədir. Bütün bu faktları nəzərə alanda Azərbaycanın AŞPA-da fəaliyyətini müvəqqəti dayandırması Avropanın ziyanına, ölkəmizin isə xeyrinədir. Azərbaycan elə bir qayadır ki, onu sarsıtmaq mümkün deyil. AŞPA kimi bir qurumda ermənipərəst deputatların kəndirbazlığı da zamanla başa çatacaq və siyasi əhvali-ruhiyyə xeyli dəyişəcək”, - deyə siyasi şərhçi diqqətə çatdırıb.
Bölmənin digər xəbərləri
