SİYASƏT
AŞPA qərəzli siyasəti ilə hazırda Cənubi Qafqazda sabitliyə böyük təhlükə yaradır - RƏY
![AŞPA qərəzli siyasəti ilə hazırda Cənubi Qafqazda sabitliyə böyük təhlükə yaradır - RƏY](/files/2024/1/1200x630/17059957156389438611_1200x630.jpg)
Bakı, 23 yanvar, AZƏRTAC
Azərbaycanın Qarabağ Zəfərindən sonra Avropa təşkilatlarının əksəriyyətinin ölkəmizə qarşı qərəzli addımlarının sayı çoxalmağa başladı. Heç şübhəsiz, belə addımlar bütün planları puç olan Fransanın təşkilatçılığı və təhriki ilə atılır. Torpaqlarımız işğal altında olan zaman susan qurumlar indi ölkəmizə təsir göstərmək üçün yeni mexanizmlər tətbiq edirlər. Avropa Şurası Parlament Assambleyasının (AŞPA) qış sessiyasının açılış günü Azərbaycan nümayəndə heyətinin etimadnaməsinin təsdiqlənməməsi və səbəb kimi Avropa Şurasının təməl prinsipləri olan fərdi azadlıq, qanunun aliliyi, öhdəliklərin davamlı şəkildə yerinə yetirilməməsi normalarının göstərilməsi belə qərəzli təşkilatların artıq ortalığa ikili standartlardan başqa yeni ideya və prinsip qoya bilmədiyini sübuta yetirdi.
Bu fikirləri AZƏRTAC-a açıqlamasında politoloq Yalçın Hacızadə söyləyib.
O qeyd edib ki, Ermənistan tərəfindən bir milyon azərbaycanlının yaşamaq kimi təməl hüququnun 30 il ərzində pozulduğunu, minlərlə insanın qətlə yetirildiyini, soyqırımına məruz qaldığını görməyən, erməni lobbisindən “qidalanan” avropalı deputatların “Qarabağdan erməni sakinlər zorakılıqla çıxarılıb” mövzusunda müzakirə açması Fransanın dəst-xəti olduğunu aşkar şəkildə göstərir.
Regionda yeni cücərən sülh ümidlərini məhv etməyə yönəlmiş belə qərarlar 75 yaşlı Avropa Şurasına nüfuz gətirməyəcək, əksinə, bu zamana qədərki fəaliyyətinə kölgə salacaq. Azərbaycan beynəlxalq hüququn pozulması halını aradan qaldırıb. BMT, ATƏT və Avropa Şurası kimi çoxüzvlü təşkilatların təməl prinsiplərinə, həm də “müharibə qanunu” kimi tanınan beynəlxalq humanitar hüququn normalarına tam əməl edib. Bu gün dünyanın müxtəlif yerlərində gedən müharibələrdə mülki insanların, infrastrukturun kütləvi şəkildə necə məhv edildiyinin şahidi oluruq.
“Rəsmi Bakı Qələbədən sonra erməniəsilli sakinlərin Azərbaycanda yaşamaları üçün beynəlxalq hüquqa və təcrübəyə əsaslanan təkliflərini dəfələrlə səsləndirib. Lakin bəzi qüvvələrin təxribatı ilə ermənilər könüllü şəkildə ərazimizi tərk etdilər. Köçənlərə təzyiqin olmamasına dair ermənilərin özləri həm Azərbaycanın, həm də Ermənistanın media nümayəndələri ilə söhbətlərində qeyd ediblər. Eyni zamanda, BMT missiyası da bölgəyə səfər etmişdi. Təşkilat səfərin yekununa dair verdiyi bəyanatda da göstərmişdi ki, erməni sakinlərin köçmələrində Azərbaycanın müdaxiləsi olmayıb. Xankəndi şəhərində mülki və ictimai obyektlərə, o cümlədən xəstəxana, məktəb, yaşayış binaları, mədəni və dini obyektlərə heç bir ziyan dəyməyib. Missiya Azərbaycan hökumətinin ərazidə səhiyyə və digər məişət xidmətlərinin bərpasına çalışdığını da qeyd etmişdi.
ATƏT-in Minsk qrupunun həmsədrlərindən biri olan Fransa sülhün qurulması istiqamətində heç bir rol oynamasa da, münaqişənin yenidən alovlanması üçün ciddi cəhdlə çalışır. Hər iki ölkənin vasitəçilərsiz irəliyə doğru addım atması, sülh razılaşması ilə bağlı müsbət ümidlərin yarandığı bir məqamda Ermənistanı silahlandırmaq, Senatda və beynəlxalq təşkilatlarda Azərbaycana təzyiq üçün qərarlar qəbul etdirmək arzusu Fransanın sülhü pozan fəaliyyətlə açıq şəkildə məşğul olduğunu göstərir”, - deyə politoloq bildirib.
Y. Hacızadə Azərbaycanın beynəlxalq təşkilatlarla işləməkdə, əlaqələrin qurulmasında maraqlı olduğunu və bu işin xarici siyasətimizin əsasını təşkil etdiyini vurğulayıb. Amma bu o demək deyil ki, hansısa təşkilat dövlətimizi ikili standartlara boyun əyməyə məcbur edə bilər. Bizə lazım olan vaxtı bu təşkilatlar susmuşdu, kor olmuşdu. Azərbaycan işğal problemini təkbaşına həll edərək Cənubi Qafqazda öz təhlükəsizliyini təmin etdi. Eyni zamanda, biz Avropanın enerji təhlükəsizliyini də təmin edən ölkələrdənik. Ona görə də Avropa Şurası və digər Qərb təşkilatları Fransanın təsiri altına düşərək məkrli qərarlar qəbul etməmişdən əvvəl bir daha düşünməlidirlər. Qərarlarının heç bir hüquqi və məcburetmə təsiri olmayan, özünü insan hüquqları qoruyucusu və müdafiəçisi kimi göstərən, lakin yurisdiksiyasına daxil olan bölgədə insan hüquqlarının pozulmasına ən böyük təhlükə mənbəyi olan, sülhün əldə edilməsinə heç bir fayda verə bilməyən Avropa Şurası Parlament Assambleyası özü qərəzli siyasəti ilə hazırda Cənubi Qafqazda sabitliyə böyük təhlükə yaradır.