Avropa Azərbaycanlıları Konqresi Yerevanda faşist generalına heykəl ucaldılmasını pisləyən bəyanat yayıb
Bakı, 24 iyun, AZƏRTAC
Avropa Azərbaycanlıları Konqresi (AAK) Hitlerin əlaltılarından olmuş, İkinci Dünya müharibəsi zamanı nasist Almaniyasının hərbi rəhbərləri ilə əməkdaşlıq etmiş “general Njde” kimi tanınan Qaregin Ter-Arutunyana Ermənistanın paytaxtında abidə ucaldılmasını pisləyən bəyanat yayıb.
Diasporla İş üzrə Dövlət Komitəsindən AZƏRTAC-a bildiriblər ki, Avropa Parlamentinə və Almaniya Bundestaqına ünvanlanan bəyanatda qondarma faktlara əsaslanan abidənin demontaj edilməsi üçün Ermənistan dövlətinə və erməni rəsmilərinə beynəlxalq təzyiqin göstərilməsinin zəruriliyi bildirilir. Avropa Azərbaycanlıları Konqresi Avropa ictimaiyyətini faşizm və ekstremizmin təzahürünə və ideallaşdırılmasına göz yummamağa çağırır.
Bəyanatda vurğulanır ki, Ermənistanın bu “milli qəhrəmanı” Ukrayna və Polşada on minlərlə dinc insanın qırğınına, yəhudilərə və nasist ideologiyasına “uyğun gəlməyən” digər xalqlara qarşı qanlı cinayətlərə, Hitlerin ölüm düşərgələrində həyata keçirilən kütləvi qətllərə görə tarix qarşısında məsuliyyət daşıyır. “Erməni legionunun öz hesabatlarında təkcə Qərbi Krımda 20 mindən çox dinc sakinin qətlə yetirildiyi etiraf olunur. Qaregin Njde Azərbaycanın Naxçıvan və Zəngəzur bölgələrində saysız-hesabsız cinayətlər törətmiş Ermənistanın “milli lideri” hesab edilir”, - deyə bəyanatda bildirilir. Bəyanatda xatırladılır ki, müharibənin sonunda Qaregin Njde hərbi cinayətkar kimi 25 illik həbs cəzasına məhkum edilərək Moskvaya göndərilib, 1946-cı ildə Lyubankadan Yerevan həbsxanasına keçirilib.
Avropa Azərbaycanlıları Konqresi hesab edir ki, məhz bu səbəblərə görə Ermənistanda nasizmin təzahürü və yenidən bərpa olunma cəhdləri dayandırılmalıdır.
Bölmənin digər xəbərləri
