AVROPA LİQASI OYUNLARINI BEŞ HAKİM İDARƏ EDƏCƏKDİR
Bakı, 3 iyun (AZƏRTAC). UEFA xətti ilə 2009-2010-cu illərdə keçiriləcək Avropa Liqası oyunlarında beş hakimdən istifadə olunması üzrə eksperiment davam etdiriləcəkdir. UEFA prezidenti Mişel Platininin buna dair müvafiq təklifi FİFA İcraiyyə Komitəsinin Baham adalarındakı Nassau şəhərində keçirilmiş iclasında təsdiq edilmişdir.
Futbol qaydalarını nizamlayan Beynəlxalq Futbol Assosiasiyaları Şurasının (BFAŞ) bundan əvvəl keçirilmiş illik baş görüşündə eksperimentin davam etdirilməsinə icazə verilmişdi. Meydançadakı baş hakim və onun yan xətlərdəki iki assistentindən başqa oyunlara daha iki köməkçi cəlb olunacaqdır. Onlar qapı xəttinin arxasında dayanaraq cərimə meydançasında baş verən hadisələri, pozuntuları, futbolçuların idmana yaraşmayan hərəkətlərini izləyəcəklər. Eksperimentlər Avropa Liqası oyunlarında davam etdiriləcək və bu da növbəti mövsümdə UEFA-nın yeni turnirinə tamaşaçıların marağını artıracaqdır.
Hakimlərin bu sistemlə oyunu idarə etməsi ilk dəfə ötən ilin payızında 19 yaşlı gənclər arasında Avropa çempionatının seçmə mərhələsinin mini-turnirlərində uğurla sınaqdan keçirilmişdir. Həm hakimlər və həm də müşahidəçilər bu sistem barədə müsbət rəylərini bildirmişlər. Eksperimentin uğurla keçməsi barədə məlumat alan BFAŞ üzvləri FİFA-ya yeni sistemi artıq peşəkar liqada davam etdirməyə icazə vermişlər.
Bölmənin digər xəbərləri
