Avropanın bir sıra ölkələrində futbol üzrə “Heydər Əliyev kuboku” turniri keçirilmişdir
Bakı, 14 may (AZƏRTAC). Mayın 12-də Avstriyanın paytaxtı Vyanada ümummilli lider Heydər Əliyevin xatirəsinə həsr olunmuş futbol üzrə “Heydər Əliyev kuboku” turniri keçirilmişdir.
Azərbaycan, Türkiyə, Avstriya, Özbəkistan, Qazaxıstan, Gürcüstan və Almaniya komandalarının iştirak etdiyi turnir ölkəmizin Vyanadakı səfirliyinin dəstəyi, “Odlar yurdu” və “Azərbaycan Akademik Birliyi” diaspora təşkilatlarının təşkilatçılığı ilə keçirilmişdir.
Diasporla iş üzrə Dövlət Komitəsindən AZƏRTAC-a verilən məlumata görə, Azərbaycanın Avstriyadakı səfiri Qalib İsrafilov, “Odlar yurdu” təşkilatının sədri İlham Nağıyev və “Azərbaycan Akademik Birliyi”nin rəhbəri Elvin Süleymanov açılış mərasimində çıxış edərək turnirin əhəmiyyətini qeyd etmişlər.
Gərgin mübarizə şəraitində keçən turnirin qalibi Gürcüstan komandası olmuşdur.
Ulu öndər Heydər Əliyevin xatirəsinə həsr olunmuş turnir Azərbaycanın Böyük Britaniyadakı səfirliyinin dəstəyi ilə mayın 13-də Londonda keçirilmiş yarış ilə başa çatmışdır. Yarışda Azərbaycan, Rusiya, Belarus, Özbəkistan və Almaniya komandaları iştirak etmişlər. Belarus komandasının qələbəsi ilə başa çatan yarış iştirakçıların və qonaqların böyük marağına səbəb olmuşdur.
Mükafatlandırma mərasimində çıxış edən “Odlar yurdu” təşkilatının sədri İlham Nağıyev bildirmişdir ki, futbol üzrə “Heydər Əliyev kuboku” turniri artıq Avropada ənənə halını almışdır. Qaliblərin olduğu bu turnirin heç vaxt məğlub tərəfi olmamışdır. Çünki ümummilli lider Heydər Əliyevin xatirəsinə həsr olunan bu turnir xalqların birliyi, dostluğu və sülh uğrunda keçirilir.
Xatırladaq ki, “Odlar yurdu” təşkilatı tərəfindən 2008-ci ildən təşkil edilən turnir əvvəlki illərdən fərqli olaraq bu il Avropanın bir neçə ölkəsində keçirilmişdir. Turnir mayın 9-da Buxarestdə, mayın 11-də isə Praqada keçirilmişdir.
Bölmənin digər xəbərləri
