Avstriya Milli Təhlükəsizlik Şurasının iclasını çağıracaq
Bakı, 1 aprel, AZƏRTAC
Rusiyanın xeyrinə casusluqda şübhəli bilinən sabiq avstriyalı kəşfiyyatçının saxlanılması ilə əlaqədar aprelin 9-da Avstriya Milli Təhlükəsizlik Şurasının iclası keçiriləcək.
AZƏRTAC Avstriya Mətbuat Agentliyinə istinadla xəbər verir ki, kəşfiyyat xidmətinin sabiq əməkdaşı Egisto Ott Daxili İşlər Nazirliyinin yüksək vəzifəli şəxslərinin telefonlarından məlumat toplayaraq onları Rusiyaya ötürməkdə şübhəli bilinir.
“Bu ittihamlar çox ciddidir və məhkəmə orqanları buna aydınlıq gətirilməlidir. Eyni zamanda, ölkədəki təhlükəsizliklə bağlı vəziyyəti qiymətləndirmək və aydınlaşdırmaq lazımdır. Biz Rusiyanın casus şəbəkələrinin ölkəmizi təhdid etməsinə yol verə bilmərik”, - deyə Avstriya Kansleri Karl Nehammer bildirib.
Egisto Otta qarşı təhqiqat 2017-ci ildən bəri davam edir. O, vəzifə səlahiyyətlərindən ölkəsinin zərərinə sui-istifadə etməkdə ittiham olunur.
Bölmənin digər xəbərləri
