AZƏRBAYCAN-ALMANİYA HƏRBİ ƏMƏKDAŞLIĞININ PERSPEKTİVLƏRİ MÜZAKİRƏ OLUNMUŞDUR
Müdafiə Nazirliyinin mətbuat xidmətindən AZƏRTAC-a bildirmişlər ki, nazir general-polkovnik Səfər Əbiyev noyabrın 3-də Almaniyanın ölkəmizdəki səfiri Detlef Lingeman və hərbi attaşesi, briqada generalı Peter Şafranek ilə görüşmüşdür. Nazir qeyd etmişdir ki, Azərbaycan-Almaniya münasibətləri yüksələn xətlə inkişaf edir. Hərbi sahədə də əməkdaşlığımız yaxşı vəziyyətdədir və biz hərbi əməkdaşlıq haqqında sazişin layihəsini sizə təqdim etmişik. Ümid edirik ki, tezliklə bu saziş imzalanacaqdır.
Səfir Detlef Lingeman bildirmişdir ki, biz tez-tez baş tutan görüşlərimizi Almaniya-Azərbaycan əməkdaşlığının uğurla inkişaf etdirilməsinə dəstək kimi qiymətləndiririk.
Briqada generalı Peter Şafranek hərbi əməkdaşlıq layihəsinin müzakirə prosesində olduğunu və Azərbaycanda hərbi attaşelik missiyasının başa çatdığını qeyd etmişdir.
Görüşdə Azərbaycan-Almaniya hərbi əməkdaşlığının perspektivləri müzakirə olunmuşdur.
Bölmənin digər xəbərləri
