Azərbaycan-Avstraliya-Türk Dostluq Cəmiyyəti beynəlxalq və yerli qurumlara müraciət edib
Bakı, 6 avqust (AZƏRTAC). Azərbaycan-Avstraliya-Türk Dostluq Cəmiyyəti son vaxtlar təxribatçı fəaliyyətini intensivləşdirən Ermənistanın təcavüzkar siyasəti və onun regiona təsiri barədə Avstraliya hakimiyyət orqanlarına, ölkədəki tanınmış mətbuat orqanlarına və beynəlxalq təşkilatların nümayəndəliklərinə müraciət edib.
Qurumdan AZƏRTAC-a bildirilib ki, müraciətdə Ermənistan Silahlı Qüvvələri və Ermənistanın dəstəklədiyi separatçı silahlı qruplar tərəfindən Azərbaycan və Ermənistan arasında mövcud atəşkəs rejiminin intensiv pozulmasından dərin narahatlıq ifadə edilir.
Bildirilir ki, son günlər Ermənistan silahlı qüvvələrinin qoşunların təmas xəttində atəşkəsi mütəmadi pozmaları nəticəsində Azərbaycan hərbçiləri öldürülür, sərhəd bölgələrində yaşayan dinc əhaliyə, o cümlədən uşaqlara odlu silahlardan atəş açılır. Ermənistan ATƏT-in Minsk Qrupunun vasitəçiliyi ilə münaqişənin sülh yolu ilə həlli istiqamətində aparılan danışıqlar prosesinin pozulmasına və Azərbaycanın beynəlxalq səviyyədə tanınan ərazisində qondarma “Dağlıq Qarabağ Respublikası”nın tanıdılmasına çalışır. “Bu, Avropa İttifaqının enerji asılılığını azaltmaq məqsədi ilə enerji mənbələrini və marşrutlarını diversifikasiya etmək cəhdləri fonunda baş verir. Hesab edirik ki, bu təxribatlar regionda tək və etibarlı enerji mənbəyi rolunu oynayan Azərbaycanda qeyri-sabitlik yaratmağa hesablanmış mənfur siyasətin tərkib hissəsidir”, - deyə sənəddə bildirilir.
Müraciətdə beynəlxalq ictimaiyyətə regionda sabitliyin qorunması və tərəflər arasında davam edən sülh danışıqları prosesinə inamın qorunub saxlanılması naminə, separatizmin bütün hallarına eyni yanaşma göstərilməsi, bütün növ qanunsuz işğal faktlarının pislənməsi, münaqişənin alovlanmaması üçün Ermənistan hökumətinə təzyiqlərin artırılması və müvafiq sanksiyalar tətbiq edilməsi tövsiyə edilir.
Eyni zamanda müraciətdə Ermənistanın BMT Təhlükəsizlik Şurasının və digər təşkilatların müvafiq qətnamələrinə məhəl qoymamasına da toxunulub.
Bölmənin digər xəbərləri
