AZƏRBAYCAN-AVSTRİYA BİZNES FORUMU BAŞA ÇATMIŞDIR
İqtisadi İnkişaf Nazirliyi Sahibkarlığın İnkişafı Departamentinin direktoru Əlihüseyn Şalıyev oktyabrın 17-də Bakı Biznes Mərkəzində keçirilmiş Azərbaycan-Avstriya biznes forumunun yekunları ilə bağlı AZƏRTAC-ın müxbirinə bildirmişdir ki, tədbir əhəmiyyətli olmuş, ölkələrimiz arasında gələcək əməkdaşlığın əsas istiqamətləri müəyyən edilmişdir. Neft-qaz boruları ilə təchizat, tikinti, yük daşımaları, kommunikasiya qurğularının və yanacaqdoldurma məntəqələrinin quraşdırılması, nəqliyyat sektorunda məsləhət, tullantıların yığılması və emalı, maşınqayırma və poladtökmə sahələrində birgə istehsalın təşkili, kimya sənayesində əməkdaşlığın genişləndirilməsi, mineral gübrə istehsalının təşkili, kənd təsərrüfatı məhsullarının yetişdirilməsi, emalı, qablaşdırılması və digər sahələrdə birgə, qarşılıqlı fəaliyyətin qurulması barədə bir sira razılaşmalar əldə edilmişdir. Eləcə də lizinq müqavilələri yolu ilə Avstriyadan avadanlıq alınıb yerli iş adamlarına çatdırılması, ölkəmizdə istehsal olunan məhsulların Avropa standartlarına uyğunlaşdırılması sahəsində əməkdaşlığın genişləndirilməsi ilə əlaqədar birgə tədbirlər müəyyən edilmişdir.
Forumda Azərbaycanın 40-a yaxın iş adamı, Avstriyanın isə ABB AG, AUSTRİA RALL ENGİNEERİNG, DIPL.-ING. STEFAN LANDAU, HABASIT AG, ROXSEL Handelges.m.b.H., SCHALLER LEVENSMITTELTECHNIK GMBH şirkətlərinin nümayəndələri iştirak etmişlər.
Avstriyalı qonaqlar Bakının görməli yerləri, tarixi, mədəniyyət abidələri ilə də tanış olmuşlar.
