Azərbaycan Dövlət Teatr Muzeyində Xocalı qurbanlarının xatirəsi anılıb
Bakı, 25 fevral, AZƏRTAC
Fevralın 25-də Cəfər Cabbarlı adına Azərbaycan Dövlət Teatr Muzeyində Xocalı qurbanlarının xatirəsinə həsr olunmuş “Heç kim və heç nə unudulmur” adlı tədbir keçirilib.
AZƏRTAC xəbər verir ki, tədbirdə muzeyin elmi işlər üzrə katibi Rəna Salahova, Xocalı sakini, o hadisələrin şahidi, şəhid anası Ceyran Əzizova çıxış edərək Xocalı qırğını qurbanlarının - erməni silahlı birləşmələri tərəfindən kütləvi şəkildə qətlə yetirilən Azərbaycanın Xocalı şəhəri sakinlərinin xatirəsini anıblar.
Vurğulanıb ki, Erməni silahlı birləşmələri fevralın 25-dən 26-na keçən gecə keçmiş sovet ordusunun Xankəndidə yerləşən 366-cı motoatıcı alayının hərbi qulluqçularının iştirakı ilə Xocalı şəhərini işğal edib. Hücum zamanı və ondan sonra yüzlərlə dinc sakin həlak olub, yaralanmış və itkin düşmüşdür.
Vurğulanıb ki, bu faciəni xalqımız təkcə respublikamızda deyil, dünyanın bir sıra ölkələrində müxtəlif anım mərasimləri və tədbirlərlə yad edir. Cəfər Cabbarlı adına Azərbaycan Dövlət Teatr Muzeyi də hər zaman Xocalı qurbanlarının xatirəsini ehtiram və böyük hörmətlə anır.
Tədbirdə soyqırımına həsr olunan və burada törədilən dəhşətləri əks etdirən ədəbi-bədii kompozisiya təqdim olunub.
Bölmənin digər xəbərləri
