AZƏRBAYCAN İDMANÇILARI DÜNYA ÇEMPİONATINDA 5 QIZIL MEDAL QAZANMIŞLAR
AZƏRTAC xəbər verir ki, idmançılarımız Kiprin Limasol şəhərində Beynəlxalq Həvəskar Kikboksinq Assosiasiyası (WPKA) versiyası üzrə dünya çempionatında uğurla çıxış edirlər.
Kikboksinq Federasiyasının vitse-prezidenti Oqtay Mehdiyev bildirmişdir ki, yeniyetmələr, gənclər, böyüklər və veteranlar arasında təşkil edilən yarışda artıq Azərbaycanın 5 kikboksçusu dünya çempionu adını qazanmışdır.
Veteranlar arasında keçirilən yarışlarda federasiyanın prezidenti, Milli Məclisin deputatı Adil Əliyev (82 kq) qızıl medal qazanmışdır.
Kişilərin mübarizəsində Rəhim Allahverdiyev (63,5 kq), Xəyal Əhmədov (76 kq) və Hafiz Baxşəliyev (88,5 kq) bütün rəqiblərinə qalib gələrək fəxri kürsünün ən yüksək pilləsinə qalxmışlar. Digər idmançımız Şaban Şahpələngov (45 kq) isə yeniyetmələr arasında birinci olmuşdur.
Çempionata mayın 11-də yekun vurulacaqdır.
Bölmənin digər xəbərləri
