RƏSMİ XRONİKA
AZƏRBAYCAN İLƏ İSVEÇRƏ ARASINDA SƏNƏD İMZALANMIŞDIR
AZƏRTAC-ın xüsusi müxbiri xəbər verir ki, yanvarın 25-də Davosda Azərbaycan Respublikasının Rabitə və İnformasiya Texnologiyaları Nazirliyi ilə İsveçrə Konfederasiyasının Ətraf Mühitin Mühafizəsi, Nəqliyyat, Energetika və Rabitə Departamenti arasında “Rabitə və informasiya texnologiyaları sahəsində əməkdaşlıq haqqında anlaşma memorandumu” imzalanmışdır.
Sənədi Azərbaycan tərəfindən rabitə və informasiya texnologiyaları naziri Əli Abbasov və İsveçrə tərəfindən departamentin rəhbəri Morits Loyenberger imzaladılar.
Sənəddə Prezident İlham Əliyevin təşəbbüsü ilə regionda informasiya texnologiyaları sahəsində həyata keçirilən böyük layihələrdən biri olan Avropa və Asiya arasında yüksək sürətli informasiya magistralının yaradılmasında Azərbaycanın aparıcı rolu göstərilir.
Memorandumda poçt rabitəsi sahəsində böyük təcrübəsi olan İsveçrə ilə ölkəmiz arasında poçt sisteminin müasirləşdirilməsi, inkişafı və informasiya texnologiyaları sahəsində əməkdaşlıq nəzərdə tutulur.