AZƏRBAYCAN KARATEÇİLƏRİ AVROPA ÇEMPİONATINDA BİR QIZIL, BİR GÜMÜŞ VƏ İKİ BÜRÜNC MEDAL QAZANMIŞLAR
Bakı, 9 aprel (AZƏRTAC). Kiyevdə keçirilən kyokuşin karate üzrə Avropa çempionatı başa çatmışdır. Çempionatda Azərbaycan Kyokuşin Federasiyasının prezidenti Allahverdi Rüstəmovun başçılığı ilə 14 idmançı iştirak etmişdir. Yarışlarda 29 ölkədən min nəfərə yaxın idmançı 10 çəki dərəcəsi üzrə mübarizə aparmışdır.
Gənclərin mübarizəsində Azərbaycan idmançısı Munis Tahirov (55 kq) qızıl medala layiq görülmüşdür. Digər idmançımız Vaqif Cəfərov (60 kq) gümüş medal qazanmışdır. Bürünc medalların sahibləri isə Sadiq Həsənov (65 kq) və Etibar Məmmədov (70 kq) olmuşlar.
Böyüklərin yarışında Elnur Səlimov (70 kq) və Surac Əliyev (mütləq çəki) 8 ən güclü idmançı sırasına daxil olmuşlar.
######
Bölmənin digər xəbərləri
