Azərbaycan Kinematoqrafçılar İttifaqı “Dramaturgiyanın 36 vəziyyəti” təliminə qəbul elan edib
Bakı, 7 aprel, AZƏRTAC
Azərbaycan Kinematoqrafçılar İttifaqı (AKİ) kinematoqrafçılar, gənc ssenaristlər, bu peşənin incəliklərini öyrənmək istəyənlər üçün davamlı təlimlər keçirir. Bu istiqamətdə işlərin davamı olaraq AKİ bu dəfə “Dramaturgiyanın 36 vəziyyəti” təliminə qəbul elan edib.
İttifaqdan AZƏRTAC-a bildirilib ki, kinorejissor, prodüser Oleq Səfərəliyev tərəfindən tərtib olunmuş təlim proqramı Jorj Poltinin məşhur “36 vəziyyət” nəzəriyyəsi əsasında qurulacaq. Jorj Polti 1200 dramaturji əsəri analiz edib onların cəmi 36 vəziyyətdən ibarət təsnifatını verib.
Azərbaycan Kinematoqrafçılar İttifaqının təşkil etdiyi təlimin hər dərsində üç vəziyyət analiz edilib, nümunələrlə şərhlər veriləcək, iştirakçılar məşhur nəzəriyyənin vasitəsilə dramaturgiyanın incəliklərini öyrənib öz sinopsislərini inkişaf etdirəcəklər.
Dərslər həftədə bir dəfə olmaqla 12 dərsi əhatə edəcək. Qeyri-iş saatlarında keçiriləcək dərslərlə yanaşı, təlimçi, sinopsislərin inkişafı məqsədilə həftə içi iştirakçılarla görüşlər keçirəcək.
Təlimə müraciət etmək istəyənlər aprelin 15-nə qədər sinopsis (minimum 1 səhifə), motivasiya məktubu və bioqrafiyalarını [email protected] elektron ünvanına “Dramaturgiyanın 36 vəziyyəti” başlığı ilə müraciət edə bilərlər.
Bölmənin digər xəbərləri
