Azərbaycan Prezidenti İlham Əliyev fevralın 5-də Prezident sarayında Azərbaycan Həmkarlar İttifaqları Konfederasiyasının III qurultayının iştirakçılarını qəbul etmişdir.

Prezident İLHAM ƏLİYEV qonaqlara müraciətlə dedi:

-Hörmətli qonaqlar!

Mən sizin hamınızı Azərbaycanda salamlayıram. Azərbaycana xoş gəlmisiniz.

Siz Azərbaycan Həmkarlar İttifaqları Konfederasiyasının III qurultayında iştirak etmək üçün ölkəmizə gəlmisiniz və bu onu göstərir ki, sizin aranızda olan münasibətlər çox yüksək səviyyədədir. Azərbaycan Həmkarlar İttifaqları Konfederasiyası da özünün beynəlxalq əlaqələrini böyük dərəcədə möhkəmləndirə bilmişdir. Müxtəlif ölkələrdən Azərbaycana gəlmiş qonaqlar bu müddət ərzində, əlbəttə ki, qurultayda da iştirak edəcək və ölkəmizlə də tanış olmaq üçün fürsət əldə edəcəklər.

Mən əminəm ki, Azərbaycanda olmağınız Azərbaycan Həmkarlar İttifaqları Konfederasiyası ilə sizin təmsil etdiyiniz qurumlar arasında əməkdaşlığın dərinləşməsi üçün yaxşı imkanlar açacaqdır. Ölkəmizin əhalisinin sayı 8,6 milyon nəfər olduğu halda, həmkarlar ittifaqları 1 milyon 500 mindən çox insanı birləşdirir. Bu, böyük qüvvədir və mən hesab edirəm ki, Azərbaycanda əmək hüquqlarının qorunmasında, işçilərin sosial məsələlərinin həllində həmkarlar ittifaqlarının çox mühüm rolu var.

Bizim ölkə öz iqtisadiyyatını bazar prinsipləri üzərində qurubdur. Biz Sovet İttifaqının tərkibində yaşayanda, əlbəttə, ictimai-siyasi quruluş tamamilə başqa idi. Amma indi bütün MDB dövlətlərində bazar iqtisadiyyatı prinsipləri üstünlük təşkil edir. Belə olan halda, əlbəttə, işçilərlə işverənlər arasındakı münasibətlər tənzimlənməlidir, işçilərin hüquqları tam şəkildə qorunmalıdır. Dövlət öz tərəfindən qəbul edilmiş qərarlarla bu sahəyə töhfəsini verməlidir və verir.

Azərbaycanda sosial məsələlərin həllinə son zamanlar böyük vəsaitlər ayrılır, işçilərin əmək haqları ildə bir neçə dəfə artırılır. O cümlədən minimum əmək haqqı bir neçə dəfə artırılmışdır. Hesab edirəm ki, gələcəkdə, ölkəmizin iqtisadi imkanları genişləndikcə bu sahəyə daha da böyük diqqət göstəriləcəkdir.

Mən əminəm ki, qurultayda səslənən fikirlər, məruzələr böyük maraq doğurur və bu baxımdan qurultay uğurlu olacaqdır. Eyni zamanda, bu, yeni imkan yaradır ki, müxtəlif ölkələrdən olan nümayəndələr bir yerə yığışsınlar, görüşsünlər, öz dostluq münasibətlərini daha da möhkəmləndirsinlər və ölkələrimiz arasında əməkdaşlıq, o cümlədən bu sahədə sürətlə inkişaf etsin.

Panavropa Regional Həmkarlar İttifaqları Şurasının prezidenti, Rusiya Müstəqil Həmkarlar İttifaqları Federasiyasının sədri, Həmkarlar İttifaqları Beynəlxalq Konfederasiyasının vitse-prezidenti MİXAİL ŞMAKOV görüşdə çıxış edərək dedi:

-Sağ olun, hörmətli İlham Heydər oğlu. Mən, Şmakov Mixail Viktoroviç Rusiya Müstəqil Həmkarlar İttifaqları Federasiyasının sədri və eyni zamanda, Panavropa Regional Həmkarlar İttifaqları Şurasının prezidentiyəm. Möhtərəm İlham Heydər oğlu, bu qəbula görə, həmkarlar ittifaqları hərəkatında mövcud problemləri Sizinlə müzakirə etmək imkanına görə minnətdarıq. Biz bilirik ki, Siz Azərbaycan Həmkarlar İttifaqları Konfederasiyasına çox səmimi münasibət bəsləyirsiniz. Heç şübhəsiz, biz Azərbaycan Həmkarlar İttifaqları Konfederasiyasının Beynəlxalq Həmkarlar İttifaqları Konfederasiyasında, Panavropa Regional Həmkarlar İttifaqları Şurasında apardığı işləri yüksək qiymətləndiririk. Hazırda Azərbaycan Həmkarlar İttifaqları Konfederasiyası bizim təşkilatın Baş şurasının - Panavropa Regional Həmkarlar İttifaqları Şurasının üzvüdür. Əlbəttə, biz Azərbaycanın təcrübəsini həmişə təbliğ edirik. Bu təcrübə ondan ibarətdir ki, Sizin ölkənizin, respublikanızın əmək qanunvericiliyində çoxları üçün bəlkə də hələ əlçatmaz olan belə bir müddəa vardır ki, işçinin işə qəbul edilməsi, işdən azad olunması ilə bağlı bütün məsələlər hökmən həmkarlar ittifaqları ilə müzakirə edilməlidir. Hesab edirik ki, bu, bütövlükdə Azərbaycanın və əlbəttə, Azərbaycan Həmkarlar İttifaqları Konfederasiyasının çox böyük nailiyyətidir.

Daha sonra M.Şmakov MDB ölkələrində, o cümlədən Azərbaycanda işəgötürənlərlə işçilər arasında münasibətlərdən, bu sahədə həllini gözləyən problemlərdən və digər məsələlərdən danışdı. O, qarşıda duran vəzifələrin həlli üçün MDB ölkələri həmkarlar ittifaqlarının fəal təcrübə mübadiləsi apardığını, ümumi problemlərin həlli üçün səyləri birləşdirdiyini bildirdi. Bu baxımdan Bakıda keçirilən qurultayın böyük əhəmiyyətini vurğuladı. M.Şmakov dedi:

-Fevralın 26-da Panavropa Regional Həmkarlar İttifaqları Şurası və Həmkarlar İttifaqlarının Beynəlxalq Konfederasiyası Azərbaycanda qeyri-formal iqtisadiyyata qarşı mübarizə məsələlərinin müzakirəsinə və öyrənilməsinə həsr olunmuş layihəyə başlayacaqdır. Biz Azərbaycanda bu layihəni başlamaqla müvafiq orqanlara müraciət etmək istərdik ki, bu layihə dövlət tərəfindən bəyənilsin və ya dəstəklənsin, çünki bu, elə bir ümumi problemdir ki, onun həlli hamımıza kömək edə bilər.

Sonra çıxış edən Türk İşçi Həmkarlar İttifaqları Konfederasiyasının təhsil üzrə katibi NİHAD YURDAKUL dedi ki, bu gün burada Sizinlə birlikdə olmaqdan məmnun olduğumu ifadə etmək istəyirəm. Türkiyədə çalışan bütün işçi qardaşlarımın və bütün türk xalqının Sizə hörmət və ehtiramını çatdırmaq istəyirəm. Böyük dövlət adamı və böyük lider mərhum Heydər Əliyevin biz “bir millət, iki dövlətik” müdrik kəlamına söykənərək, hazırda Sizin liderliyinizlə iki ölkə arasındakı iqtisadi və sosial əlaqələr genişlənməkdə davam etməkdədir. Bunu məmnuniyyətlə vurğulayıram ki, Sizin öndərliyinizlə Türkiyə və Azərbaycanın həmkarlar ittifaqları arasında əməkdaşlıq, sosial əlaqələr bundan sonra da genişlənəcəkdir. Sizin rəhbərliyinizlə Azərbaycanda həyata keçirilən sosial siyasətin əməkçilərin mənafeyinə uyğun olaraq, gələcəkdə də inkişaf edəcəyini bilirik. Sizə bundan sonrakı fəaliyyətinizdə də uğurlar diləyirəm.

Həmkarlar İttifaqları Ümumi Konfederasiyasının baş katibi VLADİMİR ŞERBAKOV öz çıxışında dedi:

-Burada olmağımıza imkan yaratdığınıza görə Sizə çox minnətdaram. Mən Sizin atanızı çox yaxşı tanıyırdım. O, SSRİ Nazirlər Sovetinin sədrinin birinci müavini olanda mən baş direktor idim. Orada rastlaşırdıq. Ümumiyyətlə, mən ona minnətdaram, onunla 10 il bundan əvvəl burada görüşmüşdük. Sizin gözəl ölkənizin bütün uğurlarını diqqətlə izləyirəm. Son üç ilin göstəriciləri məni heyran etdi. Bu illərdə ÜDM-in artımı 26 faiz, 34 faiz, 30 faiz olmuşdur. Jurnalda Sizin məqalənizi də oxumuşam. İndi ölkəniz sosial problemlərin həlli baxımından Rusiyaya çox oxşayır. Təhsil sistemi, mədəniyyətin inkişafı, mənzil tikintisi, infrastruktur - bütün bunlar bizə yaxın olan həssas məsələlərdir, ona görə ki, indi MDB ölkələri müxtəlif tərzdə, müxtəlif səviyyədə inkişaf edir. Lakin artıq üçüncü ildir ki, biz minimum əmək haqqının əhəmiyyətli dərəcədə artırılmasına dair birgə kampaniya keçiririk. Mən ona görə “əhəmiyyətli dərəcədə” deyirəm ki, indi biz minimum əmək haqqının yaşayış minimumuna bərabər olması məsələsini qaldırmışıq. Bu sahədə məhz Qazaxıstan, Azərbaycan və Rusiya liderlik edir.

Daha sonra V.Şerbakov MDB ölkələrində, o cümlədən Rusiyada sosial məsələlərin həlli üçün görülən ardıcıl tədbirlərdən danışdı, mövcud problemlərə toxundu, həmkarlar təşkilatlarının da həmin problemlərin həllinə yardımçı olmaq məqsədi ilə əməkdaşlığı daha da genişləndirdiyini bildirdi. O dedi ki, Həmkarlar İttifaqları Ümumi Konfederasiyası ölkələrimiz arasında inteqrasiyanın güclənməsi, qarşılıqlı anlaşmanın və dostluğun daha geniş vüsət alması üçün mümkün olan hər şeyi etməyə çalışır. Mən şəxsən Sizə və Azərbaycan xalqına daha böyük firavanlıq arzulayıram. Sağ olun.

X X X

Prezident İlham Əliyev qurultay iştirakçılarına gələcək fəaliyyətlərində uğurlar arzuladı.

Görüşdən yadigar olaraq xatirə şəkli çəkdirildi.