AZƏRBAYCAN QILINCOYNADANLARI AVROPA ÇEMPİONATINDA İŞTİRAK EDƏCƏKLƏR
Bakı, 5 iyun (AZƏRTAC). İyul ayında Bolqarıstanda yaşlı qılıncoynadanlar arasında keçiriləcək Avropa çempionatında iştirak üçün Azərbaycan yığmasının tərkibi 10 gündən sonra müəyyən olunacaqdır. Azərbaycan Qılıncoynatma Federasiyasının (AQF) baş katibi Ramin Məmmədov mətbuat konfransında bildirmişdir ki, iyunun 14-15-də Bakı birinciliyi keçiriləcəkdir. Turnirin keçirilməsində məqsəd qitə çempionatına yola düşəcək heyəti müəyyənləşdirməkdir.
R.Məmmədov demişdir: “Biz yığmamızı Bolqarıstana çempinatdan 10 gün əvvəl göndərmək və orada Ukrayna yığması, yaxud yerli komanda ilə birlikdə təlim-məşq toplanışları keçirmək istəyirik”.
O, ötən ay ölkəmizdə ilk dəfə keçirilmiş “Baku Fencing Open” beynəlxalq turnirinin yekunlarına toxunaraq demişdir: “Beynəlxalq Qılıncoynatma Federasiyası İcraiyyə Komitəsinin mayın 25-də Lozannada baş tutmuş iclasında son vaxtlar keçirilmiş turnirlər təhlil olunmuşdur. “Baku Fencing Open” turnirinin fəxri qonaqları - Türkiyə, Bolqarıstan və Latviya federasiyalarının prezidentləri yarışın təşkili səviyyəsini yüksək qiymətləndirmişlər.
Ramin Məmmədov onu da vurğulamışdır ki, Bakının 2010-cu ildə yeniyetmə və gənclər arasında dünya, 2012-ci ildə yaşlı qılıncoynadanlar arasında Avropa çempionatlarını keçirmək şansı böyükdür.
Bölmənin digər xəbərləri
