AZƏRBAYCAN RESPUBLİKASININ GÜRCÜSTANDAKI SƏFİRİ KVEMO KARTLİ-BORÇALI BÖLGƏSİNİN DMANİSİ RAYONUNA GETMİŞDİR
AZƏRTAC-ın xüsusi müxbiri xəbər verir ki, tədbiri icra hakimiyyətinin başçısı Zurab Okriaşvili açaraq dmanisililərlə görüşə gəldiyinə görə rayon əhalisi adından səfirə təşəkkür etmişdir.
Ramiz Həsənov yığıncaq iştirakçılarını salamlamış və Azərbaycan Respublikasının Prezidenti İlham Əliyevin xoş arzularını onlara yetirmişdir. Səfir qeyd etmişdir ki, Azərbaycan Respublikasının Prezidenti gürcüstanlı soydaşların taleyi ilə daim maraqlanır və strateji tərəfdaş olan Gürcüstan-Azərbaycan dövlətlərinin önəmli dost münasibətləri sayəsində buradakı azərbaycanlıların dədə-baba yurdlarında sabit durumunun təmin ediləcəyinə, onların Gürcüstanın tam hüquqlu vətəndaşı kimi yaşayıb-yaradacaqlarına təminat veriləcəyinə əmindir. Dünya dövlətlərinin diqqətini çəkən böyük layihələrin Gürcüstan ərazisi vasitəsilə həyata keçirilməsində ümummilli liderimiz Heydər Əliyev məhz sizin mənafeyinizi əsas götürmüş və arzusuna da nail olmuşdur.
Sonra səfir yığıncaq iştirakçılarını açıq dialoqa çağırmışdır.
Qəmərli kənd sakinləri Həmid Abdullayev və Avtandil İskəndərov, Dmanisi xəstəxanasının həkimi İstanbul Bayramov, Yaqublu kənd məktəbinin direktoru Ənvər Süleymanov, Yuxarı Oruzman məktəbinin direktoru Rüstəm Məmmədov, Dəllər kənd sakini Esmira Mahmudova, Dmanisi qəsəbəsinin sakini İsrafil Əliyev və başqaları çıxış edərək rayonda rəhbər vəzifələrdə azərbaycanlıların qeyri-proporsional təmsil olunduğunu, torpaq islahatında ədalətsizliyə yol verildiyini, məktəb binalarının təmirə ehtiyacı olduğunu, insan hüquqlarının tapdalandığını, hüquq mühafizə orqanlarının yarıtmaz fəaliyyətini, işsizlik üzündən gənclərin rayonu tərk etdiyini və digər sosial-iqtisadi problemlərə diqqəti çəkmişlər. Belə bir fakt da vurğulandı ki, rayondakı 50 ümumtəhsil məktəblərindən 29-nun azərbaycandilli olmasına baxmayaraq təhsil şöbəsində azərbaycanlı kadr işləmir.
Səfir problemlərin əksəriyyəti barədə məlumatı olduğunu və məhz onların yaxın gələcəkdə həllinə nail olmaq niyyəti ilə belə bir görüşün keçirildiyini, avqust ayında Azərbaycan Təhsil Nazirliyinin Gürcüstandakı Azərbaycan məktəblərinə dərsliklər göndərəcəyini, Azərbaycanın ali məktəblərində Gürcüstanın Azərbaycan məktəblərinin məzunları üçün yer ayrıldığını, Dmanisinin bir neçə kəndində işsizliyi aradan qaldırmaq məqsədi ilə süd emal edəcək kiçik zavodlar tikiləcəyini bildirdi. R.Həsənov eyni zamanda Dmanisi rayon icra hakimiyyətinin başçısı ilə mövcud problemlərin həlli yollarını müzakirə etdiyini də söylədi.
Sonra səfir rayonun bir neçə azərbaycanlı kəndinə baş çəkdi.
Bölmənin digər xəbərləri
