Sizi Azərbaycan Respublikasının dövlət müstəqilliyi günü münasibətilə Milli Məclisin deputatları adından və şəxsən öz adımdan səmimi qəlbdən təbrik edir, xalqımızın xoşbəxt gələcəyi naminə həyata keçirdiyiniz işlərdə Sizə yeni nailiyyətlər arzulayıram!

İstiqlaliyyətimizin 14 ili ərzində keçdiyimiz yola nəzər yetirərkən, xalqımızın müstəqil dövlətini qurmaq və yaşatmaq uğrunda apardığı mübarizəni, siyasi varlığını qoruyub saxlamaq üçün qatlaşdığı məhrumiyyətləri, qazandığı nailiyyətləri bir daha yada salırıq. Bütün həyatını müstəqil Azərbaycan dövlətinin qurulmasına, möhkəmlənməsinə və inkişafına həsr etmiş, XX əsrin sonlarında və XXI əsrin əvvəllərində ölkəmizin bütün sahələrdə əldə etdiyi nailiyyətlərin ilhamvericisi və təşkilatçısı olmuş ulu öndərimiz Heydər Əliyevin Vətən və millət qarşısında misilsiz tarixi xidmətlərini minnətdarlıq hissi ilə xatırlayırıq. Ümummilli liderimizin altmış illik siyasi və dövlətçilik fəaliyyəti Azərbaycan xalqının əsrlər boyu ürəyində yaşatdığı müstəqil dövlətçilik arzusunun gerçəkliyə çevrilməsində müstəsna rol oynamışdır.

1969-1982-ci illərdə Heydər Əliyevin dahiyanə idarəçilik qabiliyyəti, strateji təfəkkürü və uzaqgörənliyi sayəsində Azərbaycan əsrə bərabər inkişaf yolu qət edərək, keçmiş İttifaqın qabaqcıl respublikaları sırasına çıxdı. Bu illər tariximizə siyasi, iqtisadi, sosial, mədəni yüksəliş dövrü kimi daxil olaraq, xalqımızın milli mənlik şüurunun oyanışına, dövlətçilik təfəkkürünün formalaşmasına güclü təkan verdi. İmperiya tərkibində olmağımıza baxmayaraq, məhz həmin dövrdə Azərbaycanın gələcək siyasi və dövlət müstəqilliyi üçün əsaslı zəmin və möhkəm bünövrə yaradıldı.

1993-cü il iyun ayının 15-də xalqın təkidi ilə hakimiyyətə qayıdan Heydər Əliyevin əzmkarlığı və müdrikliyi uçurumun bir addımlığında dayanan Azərbaycanı məhv olmaq təhlükəsindən xilas etdi. Ölkəmizin müstəqilliyi əbədi, dönməz və sarsılmaz oldu.

Ümummilli liderimizin həyatı və fəaliyyəti doğma xalqına sədaqətlə xidmət etmək, onun yolunda hər cür fədakarlığa hazır olmaq timsalına çevrilmişdir. Onun rəhbərliyi ilə cəmiyyət və dövlət həyatının bütün sahələrində həyata keçirilən əsaslı siyasi, iqtisadi, sosial islahatlar, hüquqi, demokratik və dünyəvi dövlət quruculuğu, vətəndaş cəmiyyəti və bazar iqtisadiyyatı prinsiplərinin bərqərar edilməsi Azərbaycanın müstəqillik yollarında ardıcıl irəliləməsi, xalqımızın rifah halının ilbəil daha da yaxşılaşdırılması üçün lazımi şərait yaratmışdır. Yeni neft və iqtisadi inkişaf strategiyasının reallaşdırılması nəticəsində ölkəmizə xarici sərmayə axını getdikcə güclənir. Neftdən götürülən gəlirdən xalqın mənafeyi üçün daha səmərəli istifadə edilməsi məqsədi ilə Neft Fondu yaradılmışdır. Sənaye və kənd təsərrüfatı sürətlə dirçəlir, manatın sabitliyi qorunur, dövlətimizin büdcə gəlirləri, valyuta ehtiyatları durmadan artır.

Azərbaycan beynəlxalq birliyin dəyərli üzvünə çevrilmişdir. Dövlətimiz Qafqaz bölgəsində sabitləşdirici rol oynayan, demokratik inkişaf yolu ilə qətiyyətlə irəliləyən, Avropa ilə Asiyanı daha sıx bağlayan nəhəng iqtisadi layihələrin təşəbbüsçüsü və təşkilatçısı kimi çox böyük nüfuz və etibar qazanmışdır. Tarixi İpək Yolunun bərpası, Bakı-Tbilisi-Ceyhan əsas ixrac neft boru kəmərinin, Bakı-Tbilisi-Ərzurum qaz kəmərinin çəkilişi layihələrinin başa çatdırılması Azərbaycanın bölgədə lider mövqelərini daha da möhkəmləndirəcəkdir.

Dövlətimiz Birləşmiş Millətlər Təşkilatının, ATƏT-in, Avropa Şurasının, Qara Dəniz İqtisadi Əməkdaşlıq Təşkilatının, İslam Konfransı Təşkilatının, Müstəqil Dövlətlər Birliyinin, İqtisadi Əməkdaşlıq Təşkilatının, GUAM regional qurumunun bərabər hüquqlu üzvüdür.

Dövlətimizin müstəqilliyini, xalqımızın əmin-amanlığını qorumağa, ölkəmizin ərazi bütövlüyünü bərpa etməyə qadir olan silahlı qüvvələr yaradılmışdır. Güclü milli ordumuz Ermənistan-Azərbaycan, Dağlıq Qarabağ münaqişəsinin beynəlxalq hüquq normaları və prinsipləri əsasında sülh yolu ilə nizama salınmasının etibarlı təminatçısıdır.

1995-ci ildə ölkəmizin yeni Konstitusiyası qəbul edilmiş və 2002-ci ildə ümumxalq səsverməsi yolu ilə daha da təkmilləşdirilmişdir. Avropa standartlarına uyğun olan möhkəm qanunvericilik bazası yaradılmış, insan və vətəndaş hüquqlarının qorunması, qanunun aliliyi təmin edilmiş, söz, fikir azadlığı, vicdan azadlığı, siyasi plüralizm cəmiyyətimizin reallığına çevrilmişdir. Heydər Əliyevin dövlətçilik, azərbaycançılıq ideyaları şüurlara hakim kəsilmişdir. Dilimizin, mənəvi dəyərlərimizin qorunması, dünyanın müxtəlif bölgələrində yaşayan soydaşlarımızın tarixi vətənlə əlaqələrinin gücləndirilməsi məqsədi ilə düşünülmüş tədbirlər görülmüşdür.

Azərbaycan xalqı xoşbəxtdir ki, Heydər Əliyevin qurub-yaratdığı dövlətə bu gün onun layiqli davamçısı İlham Əliyev rəhbərlik edir, ümummilli liderimizin başladığı taleyüklü işləri ardıcıl surətdə və qətiyyətlə həyata keçirir. Heydər Əliyevin qüdrətli zəkasından güc almış inkişaf strategiyası Azərbaycanın müstəqillik yollarında ardıcıl surətdə irəliləməsini təmin edir.

Ölkə iqtisadiyyatı sürətlə inkişaf edir, ümumi daxili məhsulun artımı davam edir, əhalinin güzəranının daha da yaxşılaşdırılması, yeni iş yerlərinin yaradılması üçün ardıcıl tədbirlər görülür. Əmək haqları, müavinətlər, pensiyalar artırılır. Regionların sosial-iqtisadi inkişafına dair dövlət proqramı həyata keçirilir, ölkəmizin siyasi, iqtisadi, sosial və mədəni həyatında əsaslı islahatlar aparılır. Dövlətimizin iştirak etdiyi nəhəng transmilli iqtisadi layihələr əzmlə davam etdirilir. Elmə, incəsənətə, idmana böyük qayğı göstərilir.

Möhtərəm cənab Prezident!

Ümummilli liderimiz Heydər Əliyevin ideyalarının yaşadılması, onun dühasının bəhrəsi olan müstəqil Azərbaycan dövlətinin daha da möhkəmləndirilməsi və inkişaf etdirilməsi naminə gördüyünüz işlərə görə xalqımız Sizə minnətdardır. Biz inanırıq ki, uğurla davam etdirdiyiniz Heydər Əliyev siyasi xətti xalqımızı və dövlətimizi işıqlı günlərə qovuşduracaqdır.

Əziz Prezidentimiz!

Azərbaycan Respublikasının dövlət müstəqilliyi günü münasibətilə Sizi Milli Məclisin deputatları adından və şəxsən öz adımdan bir daha ürəkdən təbrik edir, Sizə uzun ömür, möhkəm cansağlığı arzulayır, xalq və dövlət naminə gərgin, fədakar, şərəfli fəaliyyətinizdə yeni-yeni uğurlar diləyirəm!

Dərin ehtiram hissi ilə,

Azərbaycan Respublikasının Milli Məclisi adından

Murtuz ƏLƏSGƏROV

Milli Məclisin sədri

Bakı şəhəri, 18 oktyabr 2005-ci il.