Azərbaycan səfiri İtaliya qəzetinə müsahibəsində Ermənistanın ölkəmizə hərbi təcavüzündən bəhs edib
Roma, 30 iyul, AZƏRTAC
UNESKO-nun Dünya İrs Komitəsinin 43-cü sessiyasının Azərbaycanda uğurla keçirilməsi və bunun İtaliya mətbuatında geniş əks-səda doğurmasının ardınca İtaliyanın “Linkiesta” qəzetində erməni propaqandasının təsiri altında “Azərbaycan çox dəyərli arxeoloji əraziləri dağıdır və UNESKO bunu alqışlayır” başlıqlı erməni tərəfinin yalan və uydurma məlumatlarına əsaslanan təxribatçı məqalə dərc olunub.
AZƏRTAC xəbər verir ki, bununla bağlı Azərbaycanın İtaliyadakı səfirliyi qəzetin redaksiyasına etiraz məktubu yollayaraq erməni tərəfinin maraqlarına xidmət edən bu məqalədəki məlumatların yalan və uydurma olduğunu, məqalənin müəllifinin Ermənistanın Azərbaycana qarşı hərbi təcavüzünü görməzdən gəldiyinin anlaşılmaz olduğunu bildirib.
Nəticədə “Linkiesta” qəzeti Azərbaycanın İtaliyadakı səfiri Məmməd Əhmədzadədən geniş müsahibə alıb və müsahibə 29 iyul tarixində işıq üzü görüb.
Müsahibəsində Azərbaycan diplomatı qəzetin suallarına cavab olaraq, Ermənistan-Azərbaycan Dağlıq Qarabağ münaqişəsinin kökləri, münaqişənin tarixi, Ermənistanın ölkəmizə qarşı hərbi təcavüzünün nəticələri, qeyd olunan məqalənin hansı səbəblərdən erməni propaqandasına xidmət etdiyi, erməni lobbisinin ölkəmizə qarşı apardığı çirkin kampaniya və bunun tərəfimizdən ifşa olunması, Azərbaycanın multikulturalizm modeli, Azərbaycan-UNESKO əməkdaşlığı, münaqişəsinin nizamlanmasına dair beynəlxalq hüquqi-normativ baza və münaqişənin həlli ilə bağlı ölkəmizin mövqeyi barədə danışıb.
Müsahibə ilə aşağıdakı keçiddən tanış olmaq mümkündür:
https://www.linkiesta.it/it/article/2019/07/29/azerbaigian-armenia-djulfa-unesco/43019/
Asiman Əsədov
AZƏRTAC-ın xüsusi müxbiri
Roma
Bölmənin digər xəbərləri
