Azərbaycan səfiri Kannda beynəlxalq tədbirdə ölkəmizdəki münbit investisiya mühitindən danışıb VİDEO
Kann, 15 mart, AZƏRTAC,
Azərbaycanın Fransadakı səfirliyinin və Fransanın Lexlor şirkətinin birgə təşkilatçılığı ilə ölkəmiz Kann şəhərində keçirilən Qlobal Şəhərsalma Festivalında (MIPIM 2024) böyük və zəngin stendlə təmsil olunub.
AZƏRTAC xəbər verir ki, Azərbaycanın Fransadakı səfiri Leyla Abdullayeva Festival çərçivəsində təşkil olunmuş “Azərbaycanda sərmayə yatır” adlı konfransda iştirak edib. Lexlor şirkətinin menecer tərəfdaşı Edmond Verdyenin moderatorluğu ilə keçirilən konfransda səfir L.Abdullayeva Azərbaycan iqtisadiyyatının hərtərəfli icmalı, perspektivləri, investisiya imkanları və ixrac potensialı haqqında ətraflı məlumat verib. Ölkəmizin iqtisadiyyatının ardıcıl və dayanıqlı artım nümayiş etdirdiyini bildirib. Ölkədə qeyri-neft sektorunun inkişafına xüsusi diqqət yetirildiyini qeyd edərək, bu sektora yatırılan investisiyalardan danışıb. O, ölkənin xarici ticarətin genişlənməsi istiqamətində ardıcıl olaraq müsbət tendensiya nümayiş etdirdiyini deyib. Səfir bildirib ki, Azərbaycan Şimal-Cənub və Çin-Avropa dəniz marşrutları da daxil olmaqla müxtəlif beynəlxalq nəqliyyat dəhlizlərində əsas mərkəz kimi üstünlüyə malikdir. Səfir Ələt Azad İqtisadı Zonasından, eləcə də bu Zonanın təklif etdiyi prioritetlərdən söz açaraq ölkədə sərmayə yatırımları üçün münbit mühitin olduğunu vurğulayıb.
L.Abdullayeva azad olunmuş ərazilərimizdə aparılan quruculuq işlərindən də danışıb. Bildirib ki, Ali Baş Komandan İlham Əliyevin rəhbərliyi ilə rəşadətli Ordumuzun sayəsində Vətən müharibəsində qazanılan parlaq Qələbədən sonra qarşıda duran əsas vəzifələrdən biri məhz Qarabağın bərpası və işğaldan azad olunmuş ərazilərimizə yeni nəfəs gətirilməsidir. Bir milyona yaxın insanın öz doğma evinə qayıtması üçün hazırlanmış Böyük Qayıdış dövlət proqramından söz açan səfir 30 il ərzində Ermənistanın işğalı altında qalmış ərazilərimizdə mədəni-tarixi abidələrin yerlə-yeksan olunduğunu, məhv edildiyini, dağıdıldığını bildirib. O, həmin ərazilərin bərpasına müasir kompleks yanaşmanın dövlət siyasətinin prioritet istiqaməti olduğunu vurğulayıb. Səfir bu ərazilərdə bərpa işlərinin aparıldığını, infrastrukturun yenidən qurulduğunu diqqətə çatdırıb, Ağdam, Füzuli, Ağdərə, Zəngilan, Xocavənd, Xocalı rayonlarında erməni minalarından təmizlənmə işlərinin aparıldığını, bu rayonlarda vacib infrastruktur obyektlərinin tikildiyini, bərpaolunan enerji mənbələrinin istismarı üçün mühüm işlər həyata keçirildiyini bildirib.
Azərbaycanın cari ilin sonunda ev sahibliyi edəcəyi COP29 qlobal konfransının yüksək səviyyədə keçiriləcəyinə, bunun xalqımızın, ölkəmizin növbəti böyük uğuru olacağına əmin olduğunu deyən L.Abdullayeva “yaşıl enerji” növlərinin yaradılmasının və dünya bazarlarına nəqlinin enerji siyasətimizin prioriteti olduğunu vurğulayıb.
Azərbaycanın iqtisadi inkişaf modelinin strateji prioritetlərindən söz açan səfir iqtisadi tərəqqi strategiyasının uğurla həyata keçirilməsi nəticəsində yeni inkişaf perspektivləri yarandığını qeyd edib.
Konfrans sual-cavabla davam edib. Konfrans iştirakçıları ölkəmizdəki sərmayə yatırımı imkanları ilə maraqlanıblar.
Sonra Festivaldakı Azərbaycan stendi ziyarət edilib. Stenddə böyük ekran vasitəsilə Azərbaycan haqqında məlumat yayımlanıb, ölkəmizin dilbər guşələri, turizm zonaları, sərmayə yatırımı imkanları təqdim olunub.
Qeyd edək ki, Kann şəhərində martın 11-də başlamış Qlobal Şəhərsalma Festivalı martın 15-dək davam edəcək. Festivala dünyanın müxtəlif ölkələrində şəhər quruculuğu, arxitektura, urbanizasiya sahəsində fəaliyyət göstərən 300-dən çox aparıcı şirkət qatılıb.
Bölmənin digər xəbərləri
