Azərbaycan Turizm İnstitutunda “Hyatt Regency-Naxçıvan” otelinin təmsilçiləri ilə görüş keçirilmişdir
Bakı, 23 oktyabr (AZƏRTAC). Azərbaycan Turizm İnstitutunda (ATİ) təhsilin təcrübə ilə əlaqələndirilməsinə və inkişafına xüsusi önəm verilir. ATİ-nin bu istiqamətdə fəaliyyəti nəticəsində bir çox məzun arzuladığı və seçdiyi ixtisasa uyğun müvafiq işlə təminatında ciddi maneələrlə rastlaşmır. Məzunlar təcrübə keçdikləri turizm müəssisələri tərəfindən hətta təhsillərini başa vurmazdan əvvəl iş təklifləri alırlar.
İnstitutun mətbuat xidmətindən AZƏRTAC-a bildirmişlər ki, Bakıda ilk beynəlxalq mehmanxanalar şəbəkəsi olan “Hyatt Regency-Naxçıvan” oteli təmsilçilərinin ATİ tələbələri ilə vaxtaşırı görüşləri artıq ənənəyə çevrilmişdir. Otelin təmsilçiləri Səbinə Hüseynova, Teymur Axundov, Fərman Mehdizadə, Ralitsa Başakova və Elvin Rəşidov əvvəlcə ATİ-nin rektoru, professor Cəfər Cəfərov ilə görüşmüşlər. C.Cəfərov bildirmişdir ki, müəyyən turizm müəssisəsinin fəaliyyəti, strategiyası, işçilərin vəzifə borcları barədə tələbələri məlumatlandırması hər iki tərəf üçün faydalıdır. Bu baxımdan mehmanxananın turizm sənayesi üçün ixtisaslı, təcrübəli kadr hazırlığına göstərdiyi qayğı şəksizdir. Təsadüfi deyildir ki, “Hyatt Regency-Naxçıvan”ı məhz bu iş prinsipinə görə böyük “həyat akademiyası” adlandırırlar. Rektor daha sonra vurğulamışdır ki, ölkəmizdə fəaliyyətə başlayan brend otellərdə çalışanlar arasında ilk dəfə məhz bu mehmanxanada təcrübə keçən bir çox gənc vardır. Biz bu mehmanxanalar şəbəkəsi ilə ikitərəfli əməkdaşlıqdan olduqca razıyıq.
Tələbələrlə keçirilən görüşdə otelin təmsilçiləri ümumilikdə, otellərin insanlara yalnız müştəri xidməti deyil, xüsusilə başlıca hədəf bilinən qonaqpərvərliyin detallarını ətraflı şərh etmiş, turizmin gəzmək, əylənmək, sadəcə görmək prizmasından deyil, sivilizasiyaların qarşılıqlı inkişaf göstəricisi olduğunu xüsusi vurğulamışlar. Eyni zamanda, qonaqpərvərliyin ölkələrin iqtisadi inkişafında, maliyyə ehtiyatlarının formalaşmasında və möhkəmlənməsində əhəmiyyətindən danışmışlar. Onlar “Təlim və inkişaf”, həmçinin “İdarəçilik inkişafı” proqramlarının, yay dövründə 3 aylıq iş təklifinin ATİ tələbələri üçün əhəmiyyətli olacağına inandıqlarını ifadə etmişlər.
Bölmənin digər xəbərləri
