AZƏRBAYCANA QARŞI TÖRƏDİLƏN SOYQIRIMI SİYASƏTİ QƏTİYYƏTLƏ PİSLƏNİLİR
Beyləqan, 26 fevral (AZƏRTAC). Xocalı faciəsinin 17-ci ildönümü ilə əlaqədar Beyləqan rayonunda hazırlanmış tədbirlər planına əsasən, fevralın 25-də Heydər Əliyev muzeyində “dəyirmi masa” təşkil olunmuşdur. Tarixçilərin, ziyalıların iştirak etdiyi tədbirdə erməni millətçiləri tərəfindən 17 il bundan əvvəl həyata keçirilmiş Xocalı soyqırımı, xalqımıza qarşı törədilən qanlı hadisələr, bədnam qonşumuzun Azərbaycana qarşı apardığı təcavüzkar siyasət qətiyyətlə pislənilmişdir.
Mədəniyyət evinin kitabxanasında rayon ziyalılarının, şair və yazıçıların iştirakı ilə keçirilən tədbirdə ermənilərin Xocalıda törətdiyi cinayətlərdən danışılmış, faciəyə həsr edilmiş şeirlər oxunmuşdur.
Fevralın 26-da “Torpaq uğrunda ölən varsa Vətəndir” abidə kompleksi qarşısında ümumrayon anım mərasimində icra hakimiyyətinin başçısı İrşad Əliyev, Milli Məclisin deputatı Səfər Məmmmədov, rayon ictimaiyyəti, məktəblilər abidə önünə gül-çiçək dəstələri düzmüş, faciə qurbanlarının xatirəsini yad etmişlər. Sonra icra hakimiyyətinin binasında faciə ilə bağlı yığıncaq keçirilmişdir.
Uşaq Yaradıcılıq Mərkəzində keçirilən tədbirdə də Xocalı faciəsinin dəhşətlərindən söz açılmış, uşqların ifasında ədəbi-bədii kompozisiya göstərilmişdir. Mərkəzdə faciənin dəhşətlərini əks etdirən rəsm sərgisi təşkil olunmuşdur.
Fevralın 26-da rayonun bütün məktəblərində dərslər Xocalı faciəsinə həsr edilmişdir.
Bölmənin digər xəbərləri
