Azərbaycanda 32 turizm şirkəti elektron viza sənədləşdirə bilər
Bakı, 16 noyabr (AZƏRTAC). Hazırda Azərbaycanda 32 turizm şirkəti xarici turistlərə elektron vizaları sənədləşdirmək hüququna malikdir.
Mədəniyyət və Turizm Nazirliyinin turizm şöbəsindən AZƏRTAC-a bildirilmişdir ki, “Azərbaycan Respublikasına gələn əcnəbilər və vətəndaşlığı olmayan şəxslərə viza rəsmiləşdirilməsi sahəsində təxirəsalınmaz tədbirlər haqqında” Prezident İlham Əliyevin 30 noyabr 2012-ci il tarixli Sərəncamının icrasının təmin edilməsi məqsədilə 2013-cü ilin martın 15-dən turistlər üçün elektron viza sisteminin tətbiqinə başlanılmışdır.
Sistem bütün viza proseduralarının elektron formata yönəldilməsi məqsədilə tərtib edilmişdir. Beləliklə, turistlər bütün lazımi informasiyanı turizm şirkətlərinə və ya onların xarici ortaqlarına təqdim etməlidirlər. Bundan sonra milli şirkətlər müvafiq sənədləri hazırlayaraq Xarici İşlər Nazirliyinə (XİN) müraciət edirlər. Elektron vizalar XİN tərəfindən (təxminən 15 gün ərzində) təsdiq edildikdən sonra elektron formatda turistə göndərilir.
Bölmənin digər xəbərləri
