Azərbaycanda ilk dəfə “Microsoft ExpressRoute” xidməti istifadəyə verildi
Bakı, 29 avqust, AZƏRTAC
İnformasiya-kommunikasiya texnologiyaları sahəsində mühüm yenilik reallaşıb. Tahir Gözelin təsisçisi olduğu “Proxima Tech Solutions” ölkəmizdə ilk dəfə “Microsoft ExpressRoute” xidmətini istifadəyə verib.
“ExpressRoute” xidməti ənənəvi internet bağlantılarından fərqli olaraq məlumat ötürülməsini qapalı və sabit kanal üzərindən təmin edir. Bu isə dövlət qurumları, maliyyə sektoru və iri biznes strukturları üçün xüsusi əhəmiyyət kəsb edir. Xidmətin üstünlükləri sırasında əlavə təhlükəsizlik, daha az gecikmə, yüksək etibarlılıq və “Microsoft Azure” bulud xidmətlərinə birbaşa qoşulma imkanı yer alır. Yeni imkan sayəsində Azərbaycan qurumları rəqəmsal xidmətlərini beynəlxalq standartlara uyğun şəkildə daha çevik, sabit və təhlükəsiz idarə edə biləcəklər. Layihə “AzerTelecom” ilə əməkdaşlıq çərçivəsində həyata keçirilib. Xidmət “Microsoft”un Frankfurt (Almaniya) məlumat mərkəzinə birbaşa çıxışı təmin etməklə ölkəmizin bulud texnologiyalarına sabit və təhlükəsiz beynəlxalq inteqrasiyasına şərait yaradır.
Xidmətin əsas üstünlükləri:
● Sabit və yüksək sürət – “Microsoft”un bulud xidmətlərinə təhlükəsiz və dayanıqlı qoşulma
● Aşağı gecikmə – ənənəvi VPN bağlantılarına alternativ olaraq daha az gecikmə
● Birbaşa bulud girişi – “Microsoft”un bulud xidmətlərinin tam portfelinə birbaşa çıxış
● Maksimum təhlükəsizlik – end-to-end şifrələmə və ictimai internetdən tam təcrid olunmuş infrastruktur.
“Proxima Tech Solutions”un təsisçisi, həm də “Qarabağ” Futbol Klubunun prezidenti Tahir Gözəl bildirib ki, şirkət yalnız beynəlxalq texnologiyaların ölkəyə gətirilməsi ilə kifayətlənmir, həm də süni intellekt, kibertəhlükəsizlik və rəqəmsal müstəqilliyin gücləndirilməsi istiqamətində layihələr həyata keçirir. Onun sözlərinə görə, “Qarabağ” futbol sahəsində Azərbaycanı dünya arenasında necə təmsil edirsə, “Proxima Tech Solutions” da eyni qürurla ölkəmizi texnologiya sahəsində dünyada təmsil etməyi qarşıya məqsəd qoyur.
Əlavə məlumat üçün: proximatech.az
Bölmənin digər xəbərləri
