Azərbaycanda ilk dəfə Texniki Universitetin müəllimi Almaniyanın nüfuzlu doktorantura təqaüdünü qazanıb
Bakı, 24 iyun, AZƏRTAC
Azərbaycan Texniki Universitetinin (AzTU) gənc müəllimi İlqar Abbasov Almaniyanın nüfuzlu DAAD (Alman Akademik Mübadilə Xidmətinin) “3+1 illik“ (3 maksimum 4 illik) təqaüdünü qazanıb. O, təqaüd proqramı çərçivəsində Almaniyanın Brandenburq Texniki Universitetinin İnformatika və Mühəndislik İnstitutunda “Rəqəmli proqramla idarə olunan torna dəzgahlarında elektrik enerjisi istehlakının azaldılması” mövzusu üzrə doktorantura təhsili alacaq.
Bu barədə AZƏRTAC-a AzTU-dan məlumat verilib. Bildirilib ki, İ.Abbasov maşın mühəndisliyi ixtisası üzrə bu təqaüdü qazanan ilk azərbaycanlıdır. Təqaüd proqramı çərçivəsində onun yaşayış və təhsil xərcləri Alman Akademik Mübadilə Xidmətinin maliyyəsi hesabına ödəniləcək.
Qeyd edək ki, İ.Abbasov AzTU-nu bakalavriat (2011) və magistratura (2014) səviyyələrində fərqlənmə ilə bitirib. O, 2014-cü ildə Almaniyanın DAAD “Gənc tədqiqatçılar” təqaüdünü qazanan 4 azərbaycanlıdan biri olub. İki il müddətində Almaniyanın Frayberq Dağ-Mədən Akademiyasının Maşınqayırma, konstruksiya və istehsal sahələri fakültəsində tədqiqatçı kimi çalışıb. 2016-ci ildən AzTU-nun Maşınqayırma texnologiyası kafedrasının müəllimidir.
Bölmənin digər xəbərləri
