“Azərbaycanı kəşf et” kitabının, eyniadlı DVD-kitab və internet saytının təqdimat mərasimi keçirilmişdir
Bakı, 14 noyabr (AZƏRTAC). Noyabrın 14-də “Four Seasons” otelində Gənclər və İdman Nazirliyinin təşəbbüsü və dəstəyi ilə işıq üzü görən, “Dünya Türk Gəncləri Birliyi” İctimai Birliyi və Media Sənət Akademiyasının birgə layihəsi olan “Azərbaycanı kəşf et” adlı kitabın, eyniadlı multimedia (DVD-kitab) və internet portalının (www.explore.az) təqdimat mərasimi keçirilmişdir. Azərbaycanın bütün rayonları haqqında məlumatların toplandığı kitab Azərbaycan, ingilis və rus dillərində nəşr edilmişdir.
AZƏRTAC xəbər verir ki, layihə ümummilli lider Heydər Əliyevin 90 illik yubileyinə həsr olunmuşdur.
“Dünya Türk Gəncləri Birliyi”nin sədri Əkrəm Abdullayev təqdimat mərasimində çıxış edərək, regionları qarış-qarış gəzib ağır zəhmət hesabına belə bir layihəni ərsəyə gətirdiyinə görə müəllif Aynur Talıbovaya minnətdarlığını bildirmişdir. O qeyd etmişdir ki, ölkəmizdə son illər qeyri-neft sektorunun, xüsusən turizmin inkişafına böyük diqqət yetirilir. Bu baxımdan təqdimatı keçirilən kitab və layihə ölkəmizə təşrif buyuran hər bir xarici turist üçün Azərbaycan haqqında müfəssəl məlumat mənbəyi olacaqdır.
Azərbaycanın son illərdə qazandığı uğurlardan danışan mədəniyyət və turizm naziri Əbülfəs Qarayev ölkəmizin tanıdılması istiqamətində belə bir layihənin reallaşdırılmasının mühüm əhəmiyyətə malik olduğunu vurğulamışdır. O demişdir ki, turizmin inkişafı nəticəsində ölkəmizə gələn turistlərin sayı ildən-ilə artmaqdadır. Bu layihə Azərbaycan haqqında, o cümlədən onun rayonları, səfalı və görməli yerləri barədə məlumat əldə etmək istəyən xarici turistlərin, qonaqların bələdçisinə çevriləcəkdir.
Sonra çıxış edən gənclər və idman nazirinin müavini İsmayıl İsmayılov bildirmişdir ki, kitab və DVD-kitabdakı məlumatlar yığcam, qeyri-adi və cəlbedici şəkildə təqdim olunmuşdur. Bu məlumatlar, video və fotolar müəllif tərəfindən 7 il ərzində toplanmışdır. Əksər materiallar ilk dəfə dərc olunur. Tarixi və coğrafi məlumatların icmalında 300-ə yaxın mənbədən istifadə edilmişdir. DVD-də isə 86 peşəkar redaktə edilmiş video-çarx və 1366 nadir foto toplanmışdır.
Digər çıxışlarda Şərqlə Qərbin qovuşuğunda yerləşən Azərbaycanda kəndlə şəhər sivilizasiyasından yaranan möhtəşəm vəhdətin turistləri cəlb etdiyi diqqətə çatdırılmışdır.
Sonda müəllif Aynur Talıbova xoş sözlərə görə təşəkkürünü çatdırmış və layihədə zəhməti olan hər kəsə minnətdarlığını bildirmişdir.
Bölmənin digər xəbərləri
