Azərbaycanın 20 Yanvar faciəsinin qurbanlarının xatirəsi Malayziyanın nüfuzlu universitetində anılıb
Kuala Lumpur, 20 yanvar, AZƏRTAC
Malayziyanın qabaqcıl ali təhsil müəssisələrindən olan MARA Texnologiya Universitetində (UiTM) 20 Yanvar faciəsinin 32-ci ildönümü ilə əlaqədar geniş virtual tədbir keçirilib.
AZƏRTAC xəbər verir ki, tədbirdə Malayziya ilə yanaşı, Çin, Tailand, İndoneziya, Filippin kimi region ölkələrindən 130 nəfər iştirak edib.
“90-cı illərdən bu günə: Azərbaycanın müstəqillik və inkişaf yolu” adlı tədbirdə Azərbaycanın Malayziyadakı səfiri İrfan Davudov əsas məruzəçi qismində çıxış edib.
UiTM-in Beynəlxalq əməkdaşlıq departamentinin direktoru Haja Zeynəb iştirakçıları salamlayaraq, Azərbaycan xalqı üçün böyük mənəvi məna kəsb edən belə bir gündə Azərbaycan səfirini qonaq etməkdən məmnunluğunu ifadə edib. UiTM-in il ərzində bir neçə dəfə “Səfir mühazirələri” adlı silsilə tədbirlər keçirdiyini qeyd edərək, 2022-ci ildə belə bir silsiləyə Azərbaycan səfiri ilə başladıqlarını bildirib.
Sonra universitet rəhbərliyini təmsil edən rektor müavini professor Mohd Sazili Şahibi çıxış edib. Bildirib ki, 20 Yanvar Azərbaycan xalqının azadlıq və müstəqillik mübarizəsində xüsusi məna kəsb edir. Qeyd edib ki, belə bir tarixi hadisə barədə məhz Azərbaycan səfirindən məlumat almaq bütün malayziyalılar, eləcə də kənar ölkələrdən olan iştirakçılar üçün mühüm əhəmiyyət daşıyır.
Tədbirdə çıxış edən səfir İ.Davudov xalqımızın tarixi inkişaf yolu barədə məlumat verərək, ötən əsrin 80-ci illərinin ikinci yarısından etibarən Sovet İttifaqında meydana gələn siyasi-ictimai, həmçinin iqtisadi tendensiyalardan bəhs edib. 20 Yanvar hadisələrinin arxa planında baş verən əsas prosesləri izah edib. Diplomat bildirib ki, keçmiş Sovet İttifaqı Kommunist Partiyası Mərkəzi Komitəsinin baş katibi M.Qorbaçovun yarıtmaz siyasəti nəticəsində həmin vaxt Azərbaycana qarşı radikal separatist meyllər açıq müstəviyə keçmiş, bütün bu ekstremist cəhdlər xüsusilə Ermənistan ərazisində öz tarixi dədə-baba yurdlarında yaşayan azərbaycanlılara qarşı zorakılıqla müşayiət olunmuşdur.
İ.Davudov bildirib ki, cərəyan edən hadisələrin davamı kimi, Sovet rəhbərliyi Azərbaycan xalqını öz haqlı tələblərindən çəkindirmək üçün 1990-cı il yanvarın 19-dan 20-nə keçən gecə qanlı əməlini törətmişdir. Diplomat baş verən dəhşətli qırğına beynəlxalq ictimaiyyətin diqqətini çəkmək və hüquqi-siyasi qiymət vermək məqsədilə ulu öndər Heydər Əliyevin dərhal Moskvadakı Azərbaycan nümayəndəliyində geniş görüş keçirdiyini, bu görüşün Sovet ordusunun qanlı əməllərinin ifşa edilməsində əvəzsiz rol oynadığını vurğulayıb.
İ.Davudov bu hadisələrdən sonra da Azərbaycan xalqının əzminin sınmadığını, müstəqillik uğrunda fasiləsiz mübarizə apardığını, müstəqillik bərpa edildikdən sonra qarşılaşdığı çətinliklərdən danışıb. Xalqın tələbi ilə ölkə rəhbərliyinə qayıdan ulu öndərin müdrik siyasəti ilə ölkədə ictimai, siyasi və iqtisadi sabitliyin təsis edildiyini, Prezident İlham Əliyevin uzaqgörən əməyi nəticəsində ölkənin davamlı inkişaf mərhələsinə qədəm qoyduğunu qeyd edib. Diplomat bildirib ki, bu səylərin nəticəsində Azərbaycan xalqı 2020-ci ildə 44 günlük Vətən müharibəsi ilə öz torpaqlarını işğaldan azad edib və bununla da 20 Yanvar şəhidlərinin qanı yerdə qalmayıb.
Azərbaycan səfiri, həmçinin işğaldan azad edilmiş ərazilərimizdə aparılan böyük miqyaslı bərpa-quruculuq işlərindən də danışıb, ölkəmizin müxtəlif sahələrdəki nailiyyətləri barədə tədbir iştirakçılarını məlumatlandırıb.
Sonda Azərbaycan səfiri qonaqların çoxsaylı suallarını ətraflı cavablandırıb.
Qeyd edək ki, tədbirdə 20 Yanvar faciəsini əks etdirən qısametrajlı sənədli film də nümayiş olunub.
Vüqar Ağayev
AZƏRTAC-ın xüsusi müxbiri
Kuala Lumpur
Bölmənin digər xəbərləri
