Azərbaycanın beynəlxalq aləmdə nüfuz sahibi olması Ulu Öndərin əsasını qoyduğu siyasətin nəticəsidir
Bakı, 19 iyun, AZƏRTAC
Dahi şəxsiyyət, müasir müstəqil Azərbaycan dövlətinin qurucusu Ümummilli Lider Heydər Əliyevin 100 illik yubileyi ölkəmizdə və xaricdə xüsusi təntənə ilə qeyd olunur. Respublikamızın qazandığı uğurlara və bugünkü mövqeyinə görə hər birimiz Ulu Öndər Heydər Əliyevə borcluyuq. Bu il 100 illik yubileyini qeyd etdiyimiz Ümummilli Lider Heydər Əliyev istər SSRİ, istərsə də müstəqillik dövründə Azərbaycan dövlətinə və xalqına misilsiz xidmətlər göstərib. Bu gün ölkəmizin beynəlxalq aləmdə böyük nüfuz sahibi olması məhz Ulu Öndər Heydər Əliyevin əsasını qoyduğu siyasətin nəticəsidir.
Bunu AZƏRTAC-a açıqlamasında Milli Məclisin deputatı professor Kamilə Əliyeva söyləyib.
O qeyd edib ki, Ümummilli Lider dövlətimizin müstəqilliyi və xalqımızın rifahı naminə öz həyatını itirmək təhlükəsi ilə üzləşsə də, heç vaxt öz əqidəsindən, müqəddəs amalından geri çəkilməyib. Ötən əsrin 70-ci illərinə qədər Azərbaycan SSRİ-nin tərkibində olan respublikalar arasında ən geridə qalan respublika idi. 1969-cu ildə Heydər Əliyev Azərbaycana rəhbər təyin edildikdən sonra respublikamız böyük inkişaf mərhələsinə qədəm qoydu. Sənaye, eləcə də iqtisadiyyatın digər sahələri də sürətlə inkişaf etməyə başladı. Qısa zaman ərzində Heydər Əliyev Azərbaycanı dirçəltdi və respublikamız ön sıralara yüksəldi. Azərbaycan öz-özünü hərtərəfli təmin edə bilən az sayda olan ölkələrdən birinə çevrildi.
Deputat bildirib ki, ölkəmiz üçün çətin məqamda xalqın haqlı tələbi və təkidi ilə 1993-cü ildə hakimiyyətə qayıdan Heydər Əliyev prezident seçildikdən sonra Azərbaycan iqtisadi, siyasi inkişafa qədəm qoyub. Məhz onun səyləri nəticəsində tərəflər arasında atəşkəs elan olunub və düşmənə layiqli cavab vermək istiqamətində əsaslı ordu quruculuğunun təməli atılıb. Xarici təzyiqlərə baxmayaraq Ulu Öndərin qətiyyəti və müdrik siyasəti nəticəsində "Əsrin müqaviləsi" adlandırılan neft kontraktı imzalanıb. Azərbaycan neftinin dünya bazarına çıxarılması respublikanın iqtisadi gücünü artırıb.
K.Əliyeva vurğulayıb ki, Heydər Əliyev irsini, siyasi kursunu davam etdirən Prezident İlham Əliyev daha güclü Azərbaycan dövləti qurub. Dövlətimizin başçısı Azərbaycanı az ölkələrə nəsib olan müstəqil iqtisadiyyatı olan dövlətə çevirib. Prezident İlham Əliyev təməli Heydər Əliyev tərəfindən qoyulan Azərbaycan Ordusunu dünyanın ən güclü orduları sırasına yüksəldib. Şanlı Ordumuz Müzəffər Ali Baş Komandan İlham Əliyevin rəhbərliyi ilə Azərbaycanın 30 il işğalda qalan torpaqlarını işğaldan azad edib. Zəfərimizdən dərhal sonra Qarabağda və Şərqi Zəngəzurda bərpa və quruculuq işlərinə başlanılıb.
"Ulu Öndər Heydər Əliyev bütün həyatını Azərbaycanın müstəqilliyinə, ərazi bütövlüyünə və suverenliyinin bərpasına həsr edərək ölkəmizin bütöv olmasını arzulayırdı. Ümummilli Liderin siyasətinin layiqli davamçısı Prezident İlham Əliyev ata vəsiyyətini yerinə yetirdi. Ulu Öndərin ruhu indi şaddır. Artıq Azərbaycan dünya üçün önəmli dövlətə, söz sahibinə, güc mərkəzinə çevrilib. Bu gün hər bir azərbaycanlı Ümummilli Lider Heydər Əliyevin təməlini qoyduğu azad, demokratik, güclü bir ölkənin vətəndaşı olmasından qürur duyur", - deyə Kamilə Əliyeva bildirib.
Bölmənin digər xəbərləri
