Azərbaycanın Gürcüstandakı səfiri “Gənclik” futbol komandasının üzvləri ilə görüşüb
Tbilisi, 20 sentyabr, AZƏRTAC
Azərbaycanın Gürcüstandakı səfiri Faiq Quliyev Marneulidə fəaliyyət göstərən yeniyetmələrdən ibarət “Gənclik” futbol komandasının üzvləri ilə görüşüb.
AZƏRTAC xəbər verir ki, görüşdə səfir dünyada idmana, xüsusən də futbola olan marağın artdığını qeyd edib. Bildirib ki, uşaq və yeniyetmələrin asudə vaxtlarının səmərəli təşkili, onların sağlam ruhda böyümələri üçün idman mühüm bir vasitədir. Azərbaycan dövləti uşaq və yeniyetmələrin idmana marağının artması üçün müxtəlif layihələr həyata keçirir.
Azərbaycan Prezidentinin tapşırığına əsasən, Gürcüstandakı soydaşlarmızın da sağlam yaşamaları və idmana marağının artırılması üçün layihələr həyata keçirilir. SOCAR-ın Gürcüstandakı nümayəndəliyi bu ölkənin müxtəlif bölgələrində idman kompleksləri, meydançalar tikərək istifadəyə verir. Eləcə də digər Azərbaycan şirkətləri bu sahədə mühüm işlər görür.
F.Quliyev səfirliyin xətti ilə Ulu Öndərin doğum günü və Azərbaycan xalqının bayram və əlamətdar günləri ilə əlaqədar şahmat, futbol, voleybol turnirlərinin, marafon yarışlarının təşkil olunduğunu xüsusi qeyd edib. Bildirib ki, Gürcüstanda yaşayan soydaşlarımızın bu yarışlarda fəal iştirakı təqdirəlayiqdir.
Sonra “Gənclik” futbol komandasının baş məşqçisi və rəhbəri Əhməd İsmayılov klubun fəaliyyət barədə məlumat verib. Bildirib ki, hazırda klubda 7-17 yaş arasında 54 uşaq məşq edir. Onlardan 25-i oyunlarda iştirak edir. “Gənclik” komandası Gürcüstanda yeniyetmələr arasında keçirilən çempionatın birinci dövrəsində 22 xal toplayaraq birinci yerə çıxıb. Komanda bu uğuru ikinci dövrədə də əldən buraxmaq niyyətində deyil.
Onun sözlərinə görə, klubun 6 yetirməsi Polşa və Türkiyədə futbol akademiyalarında oxuyur, müxtəlif komandalarda gözəl oyun nümayiş etdirirlər. Onlardan Nicat Hüseynov Polşanın “Lex Poznan” komandasında oynayır. N.Hüseynov həmin komandada keçirdiyi oyunlar zamanı 17 qol vurub, 6 məhsuldar ötürmə edib.
Klubun daha 7 üzvü yaxın vaxtlarda Türkiyənin müxtəlif futbol akademiyalarına gedəcəklər. Onlar artıq birinci seçim turunu keçiblər.
Səfir F.Quliyev “Gənclik” futbol komandasının qazandığı uğurları yüksək qiymətləndirib. Onun sözlərinə görə, yeniyetmə uşaqların bu cür uğurları həm ölkədə idmanın inkişafında, həm də soydaşlarımın idmana marağının artmasında mühüm rol oynayacaq.
Səfir deyib ki, Azərbaycanın “Qarabağ” komandası UEFA Avropa Liqasının qrup mərhələsində Fransanın “Nant” komandasını məğlub etməklə tarix yazıb. İnanırıq ki, “Gənclik” komandası da parlaq qələbələri ilə bizi sevindirəcək və gələcəkdə Avroliqada və digər mühüm yarışlarda iştirak edəcək.
Faiq Quliyev “Gənclik” komandasının oyunçularının AFFA-nın nəzdində olan klublara cəlb olunmalarının mümkünlüyünü qeyd edib. Bildirib ki, bununla əlaqədar AFFA rəhbərliyinə məlumat veriləcək.
Sonda yeniyetmə futbolçulara idman geyimləri və toplar hədiyyə olunub, xatirə şəkili çəkdirilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
