Azərbaycanın ictimai və mədəni inkişafında Ağa Musa Nağıyevin rolu - elmi konfrans
Bakı, 11 iyun, AZƏRTAC
Azərbaycan Milli Elmlər Akademiyasında (AMEA) “Azərbaycanın ictimai və mədəni inkişafında Ağa Musa Nağıyevin rolu” mövzusunda elmi konfrans keçirilib.
Bu barədə AZƏRTAC-a AMEA-dan məlumat verilib.
AMEA-nın prezidenti akademik İsa Həbibbəyli konfransı açaraq Prezident İlham Əliyevin “Azərbaycan Milli Elmlər Akademiyasının 80 illiyinin qeyd edilməsi haqqında” 2025-ci il 18 mart tarixli Sərəncamı işığında bir sıra tədbirlər keçirildiyini bildirib. Qeyd edib ki, dövlətimizin başçısının Sərəncamından irəli gələrək bu günlərdə Qarabağ Universitetində Elm və Təhsil Nazirliyi və AMEA-nın birgə təşkilatçılığı ilə akademiyanın 80 illiyinə həsr olunmuş “Azərbaycan Milli Elmlər Akademiyasında Qarabağnamə ənənəsi və müasir dövr” mövzusunda elmi konfrans keçirilib.
Akademik İsa Həbibbəyli bildirib ki, AMEA Rəyasət Heyətinin tarixi binası məhz Ağa Musa Nağıyev tərəfindən vaxtsız vəfat edən oğlu İsmayılın şərəfinə 1908-1913-cü illərdə tikilib. Vurğulayıb ki, bina Şərq və Qərb memarlıq elementlərini özündə əks etdirir və yunan-roma memarlığının incəliklərini, həmçinin Azərbaycan memarlığının xüsusiyyətlərini burada görmək mümkündür.
Ağa Musa Nağıyevin xeyriyyəçilik fəaliyyətinin ictimaiyyətə və gənc nəslə çatdırılmasında nəvəsi, Milli Dəyərlərin Qorunması İctimai Birliyinin sədri tarix üzrə fəlsəfə doktoru Dilarə Nağıyevanın böyük xidmətləri olduğunu deyən akademik İsa Həbibbəyli onun bu missiyanı şərəflə yerinə yetirdiyini vurğulayıb. Bildirib ki, Dilarə Nağıyevanın “Tarix yaşadan binalar” kitabı Azərbaycan tarix elmi, ictimai və humanitar elmlərimiz üçün etibarlı mənbədir.
Daha sonra Akademiya muzeyinin baş mütəxəssisi sənətşünaslıq üzrə fəlsəfə doktoru Aynurə Həşimovanın müəllifi olduğu, Ağa Musa Nağıyevin və oğlu İsmayılın əksini tapdığı tablo konfrans iştirakçılarına təqdim edilib.
Tədbir AMEA-nın İctimai Elmlər Bölməsinin Elmi şurasının sədr müavini akademik Nərgiz Axundovanın moderatorluğu ilə davam etdirilib.
Konfransda AMEA-nın A.A.Bakıxanov adına Tarix və Etnologiya İnstitutunun şöbə müdiri professor Hacı Həsənovun “Baba irsi və tədqiqatçısı” və Azərbaycan Dövlət Pedaqoji Universitetinin dosenti Taleh Cəfərovun “Neft kralı Ağa Musa Nağıyev neftdən xeyriyyəçiliyə uzanan yol” mövzusunda məruzələri dinlənilib. Həmçinin Milli Məclisinin deputatı filologiya elmləri doktoru Jalə Əliyeva, Azərbaycan Qadınları Respublika Cəmiyyəti İctimai Birliyinin sədri Bahar Qasımova və Elm və Təhsil Nazirliyinin Zoologiya İnstitutunun əməkdaşı biologiya elmləri doktoru Yeganə Mahmudova çıxış edərək Ağa Musa Nağıyevin xeyriyyəçilik fəaliyyətindən və xalqımıza xidmətlərindən danışıblar.
Sonda çıxış edən Dilarə Nağıyeva Ağa Musa Nağıyevin 98 bina tikdirdiyini, təkcə ölkəmizdə deyil, Türkiyə və Rusiyada da xeyriyyəçiliklə məşğul olduğunu bildirib. O, Milli Dəyərlərin Qorunması İctimai Birliyinin fəaliyyəti nəticəsində Ağa Musa Nağıyevin xatirəsinə yaddaqalan işlərin görüldüyünü diqqətə çatdırıb. O, çıxışının sonunda tədbirin təşkilinə və babasının xatirəsinə verilən dəyərə görə AMEA rəhbərliyinə minnətdarlığını bildirib.
Bölmənin digər xəbərləri
