AZƏRBAYCANIN İTALİYADAKI SƏFİRLİYİ XOCALI SOYQIRIMININ 17-Cİ İLDÖNÜMÜ İLƏ BAĞLI MƏRASİM TƏŞKİL ETMİŞDİR
Roma, 26 fevral (AZƏRTAC). Fevralın 26-da Azərbaycanın İtaliyadakı səfirliyində Xocalı faciəsinin 17-ci ildönümü ilə əlaqədar anma mərasimi keçirilmişdir. Mərasimdə İtaliyada yaşayan Azərbaycan və türk diasporu nümayəndələri iştirak etmişlər.
Əvvəlcə, Xocalı soyqırımı qurbanlarının xatirəsi bir dəqiqəlik sükutla yad edilmişdir. Sonra səfir Emil Kərimov Ermənistan-Azərbaycan münaqişəsinin tarixi, ermənilərin təcavüzkar siyasəti, Xocalı soyqırımı haqqında məlumat vermişdir. Səfir XX əsrin ən dəhşətli faciələrindən biri olan Xocalı soyqırımının dünya dövlətləri və beynəlxalq təşkilatlar tərəfindən tanınması məqsədi ilə beynəlxalq ictimaiyyətin, o cümlədən İtaliya ictimaiyyətinin geniş məlumatlandırılması istiqamətində səylərin davam etdirilməsinin vacibliyini vurğulamışdır.
Daha sonra soydaşlarımızdan Elxan Əliyev və Zaur Fərhadov çıxış edərək, Xocalı soyqırımı haqqında məlumatın dünya ictimaiyyətinin diqqətinə çatdırılmasında xaricdə yaşayan azərbaycanlıları daha da fəal olmağa çağırmışlar.
Tədbirdə “Lider” telekanalının istehsalı olan “Məhv edilmiş şəhər” adlı sənədli film nümayiş etdirilmişdir.
Bundan əlavə, Xocalı soyqırımı haqqında məlumatın İtaliya ictimaiyyətinin diqqətinə çatdırılması üçün Heydər Əliyev Fondu tərəfindən təqdim edilmiş materiallar əsasında hazırlanmış xüsusi məlumat İtaliyanın dövlət qurumlarına, Romada yerləşən beynəlxalq təşkilatlar və diplomatik nümayəndəliklərə göndərilmişdir.
Bölmənin digər xəbərləri
